terça-feira, 22 de maio de 2018

Eleisaun: Fretilin rekolla prova sira "krimi eleitoral" sira nian


Sekretáriu-jeral Fretilin nian, partidu daruak ne'ebé hetan liu votu iha eleisaun sira 12 Maiu iha Timor-Leste, hatete ona, iha loron-sábadu liubá, katak partidu hetan ona prova sira hosi "krimi eleitoral" sira ne'ebé halo parte hosi dokumentasaun ne'ebé aprezenta ona ba Tribunal Rekursu. 

Iha deklarasaun sira ba Lusa, Mari Alkatiri lakohi avansa ho pormenor konkretu sira kona-ba rekursu ne'ebé a Frente Revolucionária do Timor-Leste Independente (Fretilin) aprezenta ona iha loron-sábadu kontra apuramentu hosi rezultadu lejislativu nian.

Nia esplika katak, bainhira refere ba prazu badak sira hosi prosesu eleitoral, aleinde rekursu ne'ebé aprezenta iha loron-sábadu liubá, Fretilin halo nafatin investigasaun sira.

"Ami husik Tribunal konsidera no desidi. Ne'e hanesan prosesu eleitoral ida no prazu sira hanesan badak tebes. Asaun ne'ebé ami aprezenta hanesan substansial, maibé investigasaun kontinua iha termu sira hosi krimi eleitoral sira. Ami iha fulan neen hodi halo", nia hatete ba Lusa iha sede hosi Komité Sentral Fretilin nian iha Díli.

Hatán kona-ba bainhira kesar sira ne'ebé lori ba Tribunal Rekursu reflete liuliu iha rejiaun Oecusse, ne'ebé Fretilin lakon maka'as la hanesan ho tinan 2017, Alkatiri hatete katak rekolla ona "prova sira" maibé la hato'o pormenor sira.

"Ami iha prova barak iha Oecusse. Ema sira kontinua traumatizadu. Iha karreta deskoñesidu ho ema deskoñesidu sira ne'ebé maka halo nafatin intimidasau. Ami tenki jere ne'e ho kuidadu maka'as. Asaun ikus ne'ebé maka hakarak hamosu maka konflitu entre komunidade sira, iha Oecusse no iha fatin sira seluk iha Timor", nia afirma.

Independente hosi investigasaun sira, Alkatiri hatete katak partidu sei respeita desizaun ruma hosi Tribunal Rekursu kona-ba validasaun ikus hosi rezultadu eleitoral sira.

"Tribunal hanesan tribunal, no iha Estadu ida direitu demokrátiku, desizaun ikus maka hosi tribunal no ema ruma ne'ebé iha sentidu Estadu tenki aseita", nia hatete.

Konsidera katak tanba Fretilin aumentu maka'as iha nia apoiu eleitoral implika katak "laiha lakon maibé hanesan vitória adiadu ida", Alkatiri admiti katak bele hadook aan hosi lideransa partidu nian.

"Idade konta no todan. Kontinua nafatin iha Fretilin sim, ha'u sei marka prezensa. Lidera, depois ita sei haree", nia hatete iha konversa ida bainhira hakotu konsertu ida iha CCF hodi selebra tinan 44 hosi Associação Social Democrática de Timor-Leste (ASDT), partidu daruak ne'ebé harii iha Timor-Leste no ne'ebé iha fulan-Setembru 1974 transforma ba Fretilin, iha loron-sábadu liubá.

Komentáriu sira hosi Alkatiri halo oras balun hafoin partidu aprezenta tiha iha Tribunal Rekursu, iha Díli, rekursu ida hasoru rejistu hosi rezuladu sira hosi apuramentu nasional.

"Rekursu entrega ona iha loron-sábadu iha ne'e. Sei hetan konsiderasaun. Tribunal iha oras 48 nia laran hodi hato'o buat ruma, tuir lei", konfirma hosi fonte ida hosi Tribunal Rekursu ba Lusa.

Asuntu ne'e hanesan kestaun ida ne'ebé maka ko'alia iha loron-sábadu liubá iha reuniaun ida hosi Komité Sentral Fretilin nian (CCF) iha sede partidu nian iha Díli.

Iha loron-kinta liubá, líder hosi Frente Revolucionária do Timor-Leste Independente (Fretilin) no mós primeiru-ministru, Mari Alkatiri, konfirma ona katak partidu sei hala'o hela investigasaun ba iregularidade sira ne'ebé deskonfia akontese durante votasaun, liuliu sentradu iha enklave Oecusse.

Rezultadu ida ne'ebé halo hakfodak hosi votasaun 12 Maiu maka akontese iha Rejiaun Administrativu Espesial hosi Oecusse-Ambeno (RAEOA) ne'ebé koligasaun hosi opozisaun Aliansa Mudansa ba Progresu (AMP) halakon Fretilin, Mari Alkatiri nian, iha Rejiaun Administrativu Espesial hosi Oecusse-Ambeno (RAEOA) , ho diferensa ida liu votu 11.600.

Maski líder sira hosi Fretilin kontinua jere rejiaun, partidu hetan de'it votu 10.800 kontra AMP ho votu liu 22.400. Iha tinan 2017 diferensa ne'e maka de'it votu 45.

Lakon ne'e halo Arsénio Bano - ne'ebé kaer kargu nu'udar prezidente interinu RAEOA nian hodi substitui Mari Alkatiri, bainhira Alkatiri asumi knaar primeiru-ministru nian iha 2017 - halo pedidu deskulpa públiku ida iha Facebook.

Kontajen munisipal ho apuramentu nasional konfirma ona katak Aliansa Mudansa ba Progresu (AMP) manán ona eleisaun lejislativu ho votu liu rihun 305 ka 49,6% hosi total, nune'e reprezenta maioria absoluta ida hosi fatin 34 hosi parlamentu ida ne'ebé iha fatin hamutuk 65 no posibilidade hodi harii Governu konstitusional daualuk lahó apoiu adisional ruma.

Iha fatin daruak maka okupa hosi Frente Revolucionária do Timor-Leste Independente (Fretilin), ne'ebé lidera koligasaun minoritáriu hosi Governu atual, no hetan votu hamutuk 213.324 (34,2% hosi total), mantén nune'e númeru deputadu hamutuk na'in 23.

Iha Parlamentu sei iha mós Partidu Demokrátiku (PD) - parseiru hosi Fretilin nian iha Governu dahitu - ne'ebé lakon deputadu na'in rua, hetan de'it ba na'in lima no hetan votu hamutuk 50.370 ka 8,1% hosi total no mós Frente Dezenvolvimentu Demokrátiku (FDD) ne'ebé hetan votu hamutk rihun 34 ka 5,5% hosi total no deputadu na'in tolu.

SAPO TL ho Lusa

Sem comentários: