Mídia Tenke Kontribui Ba Estadu Ho Integridade

DILI, (TATOLI) – Premiadu Nobel ba Dame iha 1996, José Manuel Ramos Horta, husu ba mídia sira atu kontribui ba Nasaun ho transparente, integridade no imparsiál tuir prinsípiu kode étika jornalístika nian.

Eis-Prezidente Repúblika ne’e husu mós orgaun Estadu sira respeita liberdade mídia, nune’e bele garante transparánsia no haburas demokrásia.

“Importante liu Estadu tenke respeita buat ne’ebé iha konstituisaun, katak mídia iha Timor-Leste tenke hetan liberdade imprensa duni hodi garante nafatin Estadu Direitu Demokrátiku”, Horta ba jornalista sira iha ámbitu Konferénsia Internasionál “Dili Dialogue Forum” ne’ebé organiza hosi Konsellu Imprensa TL iha salaun Ministériu Finansa, Aitarak-Laran, ohin.

Horta enkoraza jornalista sira tenke krítiku mezmu hakerek sala ruma hodi krítika governu, maibé ida ne’e normál. “Jornalista halo sala uitoan la’ós atu buka kedan hodi ataka, ema hotu la sees hosi sala, tantu ema baibain, governu no polítiku sira, tanba ne’e mak hakerek sala ne’e normál”, afirma.

Diplomata senior ne’e akresenta obrigasaun Estadu mak respeita liberdade imprensa no liberdade krítiku. Maibé jornalista sira tenke respeita ka obedese nafatin regra ka prinsípiu ne’ebé hatur ona iha ida-idak nia parte.

Okaziaun ne’e sita ho situasaun atuál, Horta hatan ba jornalista sira dehan laiha papél atu rezolve situasaun polítika rai-laran. “Ha’u laiha papél atu rezolve impasse polítika, maibé enkuantu parte sira bolu ha’u atu sai ponte hodi buka solusaun ba situasaun polítika ne’e, ha’u prontu”, katak nia.

Horta konfesa to’o agora seidauk simu konvite ruma hosi parte hotu oinsá bele tuur hamutuk hodi rezolve impasse ne’e, maibé espera katak polítiku sira bele rezolve lais, nune’e povu hakmatek hodi moris di’ak.

“Ha’u nia odamatan loke ba ema hotu, ha’u nunka ódiu no hirus ba ema ida, mezmu ha’u iha pozisaun polítika”, katak. “Ema atu tuda fatuk mai ha’u, entaun ha’u tuda fali ho aifunan, sira hakilar hodi tolok ha’u, ha’u fó fali múzika violinu”.

Tuir nia tempu ona atu hakotu situasaun ne’e. Maske nune’e, Horta agradese no kontente tanba halo reuniaun no prepara ona programa, orsamentu atu aprezenta iha Parlamentu Nasionál (PN), mezmu elementu balun sei falta iha governu maibé prezidente bele iha tempu badak, solusiona.

Horta akresenta importante mak governu prepara ona programa no orsamentu atu submete ba parlamentu, tanba governu ho nia membru sufisiente hodi ba oin ka hatudu sira nia servisu.

Jornalista: Zezito Silva | Editora: Rita Almeida

Imajen: Premiadu Nobel ba Dame iha 1996, José Manuel Ramos Horta. Foto Fanpage FB Konsellu Imprensa