Ministru Defeza La Tolera Kazu Maliana

DILI, (TATOLI) – Ministru Defeza, Filomeno da Paixão de Jesus, la tolera oknum Batallaun Órden Públika (BOP) hosi Polísia Nasionál Timor-Leste (PNTL) ho oknum FALINTIL-Forsa Defeza Timor-Leste (F-FDTL) ne’ebé foin lalais halo problema ba malu iha Maliana, Munisípiu Bobonaro, hafoin konsertu bankada múzika Bintang.

“Kazu Maliana ne’e kazu ema bulak. Ha’u la fó toleránsia ba ida ne’e. Ha’u ko’alia ona ho komandante F-FDTL no PNTL katak ema hanesan ne’e hasai tiha de’it hosi instituisaun rua ne’e. Ne’e solusaun ne’ebé fásil liu”, Governante hato’o kestaun ne’e ba jornalista sira iha Palásiu Prezidente Nicolau Lobato, Bairru Pité, tersa ne’e, hafoin soru-mutu ho Xefe-Estadu, Francisco Guterres Lú Olo.

Tuir nia problema ne’e akontese tanba lei no regulamentu maka la loos, entaun dezautoriza fali komandante PNTL, F-FDTL nomós Ministru Defeza no Seguransa atu foti medida ne’ebé sériu.

“Ida seluk maka tenke iha Komandu Kontrolu ka Asaun Komandu, katak, bainhira mosu kestaun sira hanesan ne’e, labele ko’alia beibeik oknum. Di’ak liu halo análiza SWOT (Strengths, Weaknesses, Opportunities, Threats), katak, polísia nia frakeza iha ne’ebé no forte iha ne’ebé, nune’e mós F-FDTL, para ita hetan loos ninia fukun ne’e iha ne’ebé”, akresenta.

Eis Brigadeiru Jenerál dehan bainhira F-FDTL no PNTL han malu beibeik ne’e, nia to’o konkluzaun kle’ur ona katak deskonfia iha grupu organizadu iha PNTL no F-FDTL para soran beibeik forsa rua atu sobu estabilidade nasionál.

“Labele haluha prinsípiu komplementaridade, katak, forsa rua ne’e kompleta malu maibé la’ós atu kompete malu no tuir fali subsidiaridade katak kuandu ida labele, ida seluk tutan embora ida-idak iha nia serbisu”, afirma.

Filomeno husu atu hadi’a no kompleta liu-tan regulamentu disiplina militár ho regulamentu disiplina polísia nian, katak, ema ne’ebé tiru pistola ka kilat arbiru de’it ne’e tenke kondena hanesan krime, tanba kilat musan ne’e la’ós atu ba tiru arbiru no kilat ne’e la’ós atu tarutu arbiru.

Nia haktuir kazu Maliana oras ne’e submete ona ba iha investigasaun séria ne’ebé hala’o hosi Komisaun Konjunta hosi PNTL no F-FDTL.

Jornalista: Xisto Freitas | Editora: Rita Almeida

Imajen: Ministru-Defeza, Filomeno da Paixão de Jesus