quarta-feira, 8 de agosto de 2018

Karreta Prado Nia Paradeiru Deputadu Sira Lahatene Ona

PARTILHAR

DILI: Karreta Prado ne’e eis-deputadu sira leilaun ona ho osan $ 8.000, maibé Konsellu Administrasaun deside anula prosesu ne’e. Maski nune’e, eisdeputadu sira seidauk entrega hikas karreta hirak ne’e.

Deputadu Bankada FRETILIN, Joaquim dos Santos hatete, Eis-Deputadu III Lejizlatura to’o oras ne’e seidauk bela hatama hikas karreta Prado ne’e la'ós sala deputadu sira nian, maibé ne’e sala eis-Prezidente PN tanba Konsellu Administrasaun Parlamentár deside halo alienasaun ba karreta Prado tuan hirak ne’ebé uzadu ona iha períodu tinan lima nia laran.

Tuir loloos, antes halo desizaun hanoin uluk sekuénsia hirak ne’ebé tuir mai ne’e, maibé Prezidente PN ansi loos hodi halo desizaun nune’e fó ultimatu ba deputadu sira atu kompleta administrasaun antes tama ba eleisaun.

Desizaun dahuluk ne’ebé konsellu Administrasaun halo ona ne’e atu leilaun karreta Prado, tanba ne’e administrativamente eis-deputadu sira tuir hotu ona nune’e karreta nia xapa matríkula tau hotu ona privadu.

Kuandu prosesu ne’e la’o sosiedade sivíl no estudante sira fó presaun, nia la konsege halo konsulta saun ho Konsellu Administrasaun Parlamentár hodi anula tiha desizaun ne’ebé antes ne’e konsellu administrasaun halo ona.

Karreta agora ne’e sai problema entaun atu rezolve Parlamentu Nasionál V lejizlatura mak tenke buka dala oinsá mak bele konklui asuntu ne’e atu labele hamosu dezentendimentu entre Presidente PN no eis deputadu sira.

“Prosesu ne’e la’o ona karreta hirak ne’e sai ona privadu ikus mai anula fali entaun desizaun ne’e nulu, eis deputadu sira lori ona karreta ne’e balun keta fa'an tan tiha mós ita lahatene la iha informasaun ona” dehan nia iha PN horisehik.

Iha fatin hanesan, Presidente Bankada CNRT, Duarte Nunes hatete, kona-ba karreta hirak ne’ebé eis-deputadu CNRT sira uza to’o agora seidauk hatama ne’e bankada dirije ona karta ba sira atu bele mai hodi rezolve.

“Ami halo ona karta ba sira atu bele mai rezolve karreta hirak ne’e tanba ne’e ami sei rezolve iha tempu badak nia laran” dehan nia iha PN.  

Iha fatin hanesan, diáriu ne’e tenta konfirma Eis-Presidente PN, Adérito Hugo da Costa, maibé rekuza hodi lakohi fó nia komentáriu.

“Ha’u lakohi kolia tanba ha’u tama fali orasida buat hirak ne’e sai boot fali, importante mak desizaun hirak ne’e tuir nia dalan”, dehan nia.

Jacinto Xavier | Independente
PARTILHAR

Author: verified_user

Publicação luso-timorense sem fins lucrativos

0 comentários: