DILI, (TATOLI) – Prezidente
Repúblika, Francisco Guterres Lú Olo, aseita ona pedidu Xefe Governu, Taur
Matan Ruak, atu nomea atuál Diretór Ajénsia Dezenvolvimentu Nasionál (AND),
Samuel Marçal, okupa kargu Ministru Planeamentu Investimentu Estratéjiku (MPIE).
Karta aseitasaun ho Nú. Ref:
GCCC/180/XIII-VIII/2018 ne’e, Gabinete Prezidénsia-Repúblika liuhusi Xefe Kaza
Sivíl, Francisco Maria de Vasconcelos, dirije ona ba Xefe Gabinete
Primeiru-Ministru, Afonso Henrique F. Corte-Real, segunda (13/9) horisehik.
Iha karta ne’e mensiona atu fó
tomada pose mós ba kandidatu membru Governu ne’ebé antes ne’e Prezidente
Repúblika dekreta ona, hanesan Alfredo Pires okupa Ministru Petróliu no Rekursu
Minerais nomós Rogério Mendonça toma pozisaun hanesan vise Ministru Agrikultura
no Peskas.
Antes fó tomada pose, Prezidente
Repúblika sei dekreta pesoál ne’ebé sei okupa kargu MPIE iha tempu badak nia
laran no informasaun ne’ebé Tatoli asesu hosi fonte kredível ida katak tomada
pose sei hala’o iha fulan-ne’e, iha Palásiu Prezidente Nicolau Lobato.
Entretantu, Primeiru-Ministru,
Taur Matan Ruak, haktuir soru-mutu ne’ebé nia halo ho Xefe-Estadu iha tersa
loraik ne’e la ko’alia kona-ba lista kandidatu membru Governu ne’ebé iha tempu
badak atu simu pose nomós hirak ne’ebé sei pendente no husu públiku hein de’it,
maibé ko’alia de’it kona-ba Lei Orgánika Governu.
Nia dehan estrutura Governu
importante loos, tanba ne’e nia husu ba ema hotu hein solusaun iha tempu oin
mai no enkuantu seidauk kompletu, tanba ne’e agora sira serbisu maka’as loos
atu Estadu ne’e la’o ba nafatin.
Jornalista: Xisto Freitas | Editora:
Rita Almeida
Imajen: Primeiru-Ministru, Taur
Matan Ruak. Foto António Goncalves
Sem comentários:
Enviar um comentário