DILI, (TATOLI) – Atleta
defisiente, liliu Komité Paralímpiku Nasionál Timor-Leste (CPNTL-sigla
portugés) husu governu atu mellora kondisaun ba atleta defisiente sira bainhira
ba kompete atividade desportiva no atletizmu iha nível nasionál nomós
internasionál.
“Ami la ezije buat barak maibé
mellora kondisaun, atleta defisiente iha rejiaun sira ne’e poténsia tebes só
ita seidauk abranje to’o iha ne’ebá”, hatete Prezidente CPNTL, Júlio Sarmento
Lopes, iha Sekretariu Estadu Juventude no Desportu (SEJD), Lecidere, domingu
(14/10), hafoin partisipa ASEAN Paralimpic Games 2018, iha Jakarta-Indonézia.
“Ha’u husu ba governu liuliu
sekretáriu estadu haree to’ok oinsá, ami la ezije tanba situasaun governu mós,
karik governu la’o, hakat pasu metin, ba oin, ami hakarak di’ak liu mellora”.
Tanba tuir prezidente CPNTL ne’e,
rai seluk ema mai ho sira-nia atleta hanesan armada, lori ró no seluk tan tula
sira nia atleta maibé sira ba lori ain-tanan hodi dudu no dada malu de’it.
“Maibé, ita la lakon mós ho sira,
ita iha poténsia, só ita lakon ho meius no tékniku de’it. Ita la’ós fraku, ita
forte”, katak tan Júlio Sarmento Lopes perante komunidade, Nélio Isaac
Sarmento, Ministra Edukasaun, Juventude no Desportu (MEJD), Dulce de Jesus
Soares no reprezentante Parlamentu Nasionál, Deputadu Komisaun F (asuntu
Juventude no Desportu ho G (asuntu sidadania, kultura no igualidade).
Tanba ne’e dala ida tan, nia
sujere ba SEJD nomós deputadu sira, futuru iha osan, haree mellora desportu
la’ós ba de’it ema ho defisiénsia maibé mós ba ema la ho defisiénsia atu nune’e
TL ba kompete, labele fila mamuk ka liman tanan.
“Maibé, mai oferese mós buat ruma
tanba osan ne’e osan nasaun nian, estadu nian, ema barak mate, tanba rai ida
ne’e. Ita nafatin lori nasaun ne’e ba mundu hodi hatutan, hatudu katak Timor
mós bele”, insiste prezidente CPNTL.
Sekretáriu Estadu Juventude no
Desportu (SEJD), Nélio Isaac Sarmento, iha biban ne’e, hateten defisiente
sira agora sai eroi foun ba nasaun, tanba hatudu prestasaun di’ak no hamorin
Timor-Leste perante komunidade internasionál liuhusi atividade desportiva.
“Eroi foun la’ós imi tenke kaer
kilat ba funu. Maibé, eroi foun katak imi enxe ukun aan ne’e ho prestasaun
maske imi defisiente”, hateten SEJD, Nélio Isaac Sarmento.
Nia orgullu liutan mak atleta
defisiente Teofilo Freitas no Pascoela dos Santos Pereira, sai inspiradór ida
ba joven atleta hotu iha Timor-Leste katak sira defisiente bele tanbasá ita
normál labele.
“Ho ida ne’e mak ha’u hakarak
lori governu nia naran agradese ba Komite Paraolímpiku Timor-Leste ba atleta
defisiente sira, liliu Teofilo no Pascoela. Imi-nia kontribuisaun importante ba
ita-nia nasaun agora hodi haree ba futuru”, agradese sekretáriu estadu ne’e.
“Ha’u dehan ba Teofilio ho
Pascoela, lalika laran taridu! Ha’u, ministra ho deputadu sira hotu sei fó
apoiu tomak oinsá mak atu bele ita-boot sira-nia kapasidade iha desportu. Ida ne’e
hatudu katak ita sei hasoru dezafiu ne’ebé barak oinsá buka kondisaun ne’ebé
espesífiku ba atleta sira ho defisiente nomós atleta sira normál”, friza SEJD
hodi reforsa tan.
Sekretáriu estadu ne’e esplika
atu kria kondisaun la’ós haree uluk valór saida mak ita sei simu maibé
kondisaun ne’e hahú kedas husi ekipamentu, fasilidade nomós infrastrutura sira
seluk ne’ebé bele uza atu hasa’e kapasidade atleta sira-nian.
“Tinan oin ita hasoru eventu
internasionál ida mós boot; Sea Games, ne’ebé sei akontese iha tinan oin iha
Manila, Filipina, sira sei kontinua nafatin ba partisipa. Kontinua partisipa,
agora ita tenke hahú kedas investimentu ba preparasaun. Se ita la halo ida
ne’e, ita lalika dehan sira ba tenke lori fila medalla, se ita la kria
kondisaun”, dehan sekretáriu estadu Nélio Isaac Sarmento.
SEJD mós husu ba atleta
defisiente sira, liliu atleta Teofilo Freitas ho Pascoela dos Santos Pereira
treinu basá sei eventu importante seluk ne’ebé sei mai. “Lorokraik ba kampu
treinu, nafatin book aan”, apela Nélio Isaac Sarmento.
Entretantu, atleta Teofilo
Freitas fila ho rezultadu “medalha de ouro” ka medalla osan mean rua no atleta
Pascoela dos Santos Pereira ho bronze ida.
Jornalista: Rafy Belo | Editora:
Rita Almeida
Imajen: Atleta defisiente hafoin
fila husi Indonézia. Foto: Agus Segoras
Sem comentários:
Enviar um comentário