DILI, (TATOLI) – Deputadu
António dos Santos Lima-Lima hosi Bankada Frente Revolusionária Timor-Leste
Independente (FRETILIN), husu ba veteranu sira iha munisípiu Ermera atu labele
impede prosesu dezenvolvimentu ne’ebé la’o, liuliu konstrusaun estrada hosi
Ermera antiga liga ba Fatubesi.
“FRETILIN kontra tentativa atu
impede konstrusaun Estrada iha Ermera, liuliu grupu ne’ebé nu’udar reprezenta
veteranu iha rejiaun IV no juventude atu labele impede kualker programa
dezenvolvimentu”, afirma António dos Santos.
Nia hatutan hodi husu ba ema hotu
nia kolaborasaun no kontribuisaun, nune’e labele impede atividade
dezenvolvimentu ne’ebé investór sira oferese.
“Iha loron hirak liubá, individu
balun ne’ebé halo grupu ida hodi refere ba sira nia án nu’udar reprezenta
veteranu rejiaun IV no juventude Ermera hala’o deklarasaun liuhosi mídia katak
sira la simu prezensa Ajénsia Internasionál ADB (Banco Asiático de
Desenvolvimento) ne’ebé implementa projetu konstrusaun Estrada hosi Ermera
antiga ba Fatubessi”, konta tuir.
Deklarasaun ne’e mosu depois
keisa hosi tékniku konstrusaun nian katak sira hetan agresaun fíziku hosi ema
balun iha Ermera ho konstrusaun atu impede sira nia servisu.
Hatan ba insidente hirak ne’e,
reprezentante povu hosi bankada opozisaun ne’e apela ba komunidade, liuliu
Ermera oan atu hamutuk apoia dezenvolvimentu no rejeita aktu saida de’it mak
atu impede atividade dezenvolvimentu.
“Estrada hosi Ermera antigu ba
Fatubessi importante tebes ba komunidade iha área ida ne’e, estrada ne’e sei
ajuda ekonomia Ermera oan sira nian, loke asesu ba transporte ba merkadu hodi
hala’o ativiadade komunidade nian, ita labele kontinua ho Estrada ne’ebé la iha
kondisaun. Oras to’o ona”, apela.
Nu’udar veteranu ida hosi rejiaun
IV, ne’ebé uluk asume kargu nu’udar responsavel iha Komandu Rejiaun IV kestiona
individu sira ne’e nia deklarasaun katak sira reprezentante veteranu rejiaun
ne’e.
“Ha’u veteranu rejiaun IV nian,
ha’u la koñese ema sira ne’e. Veteranu sira agora hamutuk apoiu dezenvolvimentu
atu hasai povu hosi kiak no mukit no lori Timor-Leste ba independénsia loloos.
Polítika bele la hanesan, maibé hanesan veteranu ami sei la impede
dezenvolvimentu”, akresenta.
Estrada hosi Ermera antiga ba
Fatubessi tama iha programa kooperasaun entre Timor-Leste ho Uniaun Europeia
(UE).
Finansiamentu mai hosi UE, ADB
nu’udar parseiru implementadór, kompañia Shanghai Construction Group hosi Xina
mak ezekuta konstrusaun ne’e.
Nia husu ba entidade hotu atu
labele lori grupu ida hodi impede dezenvolvimentu saida de’it mak akontese iha
Ermera tanba povu hein hela mudansa moris di’ak.
“Fatubessi iha suku lima no balun
izoladu tebes, kuandu to’o tempu udan la hetan asesu ba buat ida. Tanba ne’e
husu ba veteranu sira, katak hanesan Ermera oan mai ita hotu koopera”, sujere.
“To’o ona tempu kontribui ba
dezenvolvimentu, la’os ona tempu atu impede dezenvolvimentu, tanba ne’e husu
atu kontribui tomak, karik iha buat ruma naksalak mai ita tuur hamutuk hodi
haree, kontribui ba povu nia moris”, afirma.
Parte seluk, Vise Prezidente Bankada
FRETILIN, Francisco Branco, reforsa di’ak liu labele emosionál atu impede
prosesu dezenvolvimentu iha ita nia rai.
Governu iha kompeténsia, tanba
nia mak administrasaun Estadu atu deside hodi fó sai desizaun ruma atu lori
mensajen di’ak ba investór sira, nune’e sira labele sente katak sidadaun
Timor-Leste bele impede fali dezenvolvimentu nasionál.
Jornalista: Zezito Silva | Editora:
Rita Almeida
Imajen: Igreja iha Ermera. Imajen
hosi google
Sem comentários:
Enviar um comentário