Komandante Polísia Nasionál
Timor-Leste (PNTL), Superintendente Xefe Pedro Belo, husu komunidade
Beto-Tasi atu hapara konflitu no kontribui ba paz no estabildiade.
Pedro Belo hato´o lia hirak ne´e
relasiona ho ema deskoñesidu ne´ebé mak tuda rahun uma komunidade nian
hamutuk tolu iha Aldeia Beto-Tasi, hanesan estraga odamatan no sasan uma laran.
Ho ida ne´e halo komunidade balun moris la hakmatek, tanba joven
organiza ema husi bairu seluk hodi ba asalta Aldeia Beto-Tasi.
”Tanba ne´e mak iha
diálogu ida ne´e atu bolu fila-fali sira hotu atu tu´ur hamutuk nakloke koalia
ba malu ho honestidade, tanba saida mak sira halo problema beibeik ho buat sira
ne´e hotu mak ita hakarak prevene. Buat ne´ebe mak halai ba krimi oras
ne´e iha ona prosesu investigasaun, vitima mós hato´o keisa , maibe ho
diálogu ne´e atu tuur hamutuk para ba oin ne´e labele mosu tan, kuandu
problema ruma mosu, Autoridade Lokal ho Konselhu Polísiamentu Komunitaria tuur
hamutuk hodi rezolve”, esplika Pedro Belo, ba jornalista Kinta (18/10/18), sira
iha Sede Aldeia Beto-Tasi.
Maske ho diálogu ne´ebé mak
hala´o ona, hodi prevene konflitu iha Beto-Tasi, maibe tuir Xefe
Suku Interino Madohi, Julião Guterres, katak, depende ba juventude
ida-idak ninia karakter.
Ita labele dehan ho
diálogu ne´e problema hotu ona, ka sei iha. Tanba ida ne´e
karakter joven ida-idak, tanba ita Timor ne´e iha karakter oi-oin de´it.
Ne´ebé ohin mak sira rona barak komandante ninia esplika ne´e la´os
presaun, maibe ne´e hanesan fó edukasaun sivika ida ba joven sira oinsa bele
konprende sentimentu boa vontade atu simu ha´u hanoin problema sira bele
prevene”, dehan Julião Guterres.
Alende ne´e iha loron 12,
fulan ne´e, uma tolu hetan tuda ho fatuk hodi rezulta
odamatan uma nian rahun no kalen kuak, tanba tuda husi ema deskoñesidu,
wainhira konfrontu iha Beto-Tasi.
Nune´e iha loron 14, fulan ne´e,
problema kontinua alarga mai to´o Aldeia Anin-Fuik, hodi akontese ema
deskoñesidu tuda uma komundaide ninian hamutuk 8, hetan estragus hanesan
vidru janela, armari no kalen kuak.
Vijilansia iha estrada sei
maka’as
Nune’e mos, Komando Polísia
Nasionál Timor-Leste (PNTL), koloka ninia membru sira hodi hala´o
vijilansia maka´as iha estrada ninin iha parte dader no lorokraik
hodi redus konflitu iha kapital Díli laran.
“Ami iha programa rua, ida mak
atu halo vijilansia iha dalan sira ne´e i mós halo patrulamentu la´o ain iha
bairu-bairu ne´ebé mak iha potensia mosu konflitu. Ida tan mak
agora estudante sira agora hasoru izame nasionál, entaun iha membru lubuk ida
mak ita koloka ba eskola sira hodi asegura alin sira ne´ebé mak tuir hela izame
nasionál hodi asegura sira, atu ema ruma labele halo krimi hasoru estudante oan
sira”, esplika Komandante PNTL Munisípiu Díli Superintendente Xefe Pedro Belo,
Kinta (18/10/18) iha Sede Aldeia Beto-Tasi, Díli.
Razaun fundamental PNTL koloka
seguransa ba iha eskola sira ne´e, tanba antes ne´e membru autoridade seguransa
rona ona informasaun husi komunidade balun katak, iha joven balun atu ba
halo asaltu iha eskola sira. Tanba ne´e prezenza
Polísia importante hodi prevene krimi.
“Prevene krimi ne´e la´os
ita fiar de´it ba Polísia Komunitaria, maibe Polísia Komunitaria mai husi ninia
Komandante rasik. Tanba ne´e Komandante ténki tun hotu ba iha terrenu
besik komunidade atu esplika lei, oinsa para ema labele halo krimi”, dehan
Pedro Belo.
Entretantu komesa loron Tersa
(17/10/18) haree katak, iha dadersan de´it membru PNTL sira koloka
iha estrada ninin iha kapital Díli hodi asegura seguransa ba iha komunidade
sira ninia movimentu.
“Ha´u hanoin vijilansia
ne´ebé mak ami halo redus krimi ne´ebé mak akontese. Tantu ba auto
stop ne´ebé mak ami halo hela iha tempu kalan ami prende mós armas
brankas, prende farda artemarsiais. Horikalan Polísia kaer tan ema balun ne´ebé
mak uza atributu artemarsiais hodi halai ho kareta ba mai, oras ne´e
detein ona iha sela Polísia”, dehan Pedro Belo. avi
GMN TV | Grupo Média Nacional
Sem comentários:
Enviar um comentário