Lere Anan Husu Parlamentu Labele Monu Ba Presaun

DILI, (TATOLI) – Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, hateten Parlamentu Nasionál nu’udar orgaun soberanu tenke koloka án hanesan orgaun soberanu, labele monu tuir ba presaun sira, se lae orgaun soberanu laiha folin.

“Ita Timor ne’e orgaun soberanu haat de’it. Ita funu ba orgaun soberanu haat ne’e, maibé la funu ba ema ida ka ema rua nia interese. Entaun, orgaun soberanu ne’e tenke koloka ninia án katak dehan A ne’e A no B ne’e dehan B”,  Lere dehan ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho estudante sira halo manifestasaun kontra membru Parlamentu Nasionál atu kansela sosa kareta ho marka PRADO.

Tuir nia haree Parlamentu fraku tanba uluk bainhira estudante sira halo manifestasaun ba kareta, sira dada tiha sira nia desizaun no divia labele dada desizaun.

Lere husu ba universitáriu sira atu kalma ka pasiénsia, uza matenek buka rezolve problema ne’ebé iha no parlamentu nu’udar orgaun soberanu buka kontaktu atu halo diálogu ho estudante sira para bele hetan solusaun ne’ebé pasífiku liu.

“Úniku prosesu maka diálogu entre membru Parlamentu Nasionál ho estudante sira para bele kria estabilidade. Labele lori ka dudu instituisaun ida ba komete krimi seluk. Tanba, kuandu ema uza violénsia, só violénsia maka tenke hasoru. La’ós uza violénsia depois hasoru fali ho hamaus ne’e labele”, realsa.

Jornalista: Xisto Freitas | Editora: Rita Almeida

Imajen: Xefe-Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur