Ema Barak Uza Facebook Hodi Ofende Ema Nia Dignidade

MALIANA (TATOLI) — Bispu Dioseze Maliana, Don Norberto Amaral, preokupa ho utilizasaun mídia sosiál (facebook) tanba ema barak uza mídia sosiál la’ós ba aspeitu edukasaun maibé ofende ema seluk nia dignidade no tolok ema.

“Bainhira ita lee buat balun ne’ebé ema hakerek iha mídia sosiál ne’e, prinsípiu morál laiha tiha ona. Uza identidade falsu hodi tolok malu no tolok ema boot sira,” Bispu dehan bainhira soru-mutu ho Sekretáriu Estadu Komunikasaun Sosiál, Merício Akara, iha rezidénsia Bispu Don Noberto, Maliana Vila, Munisípiu Bobonaro, semana kotuk.

Tuir Bispu katak, nu’udar Katóliku ne’ebé proporsionamente maioria iha Ázia, prinsípiu morál laiha tiha ona no karik iha maibé mihis tiha ona tanba impaktu uza rede sosiál la tuir nia dalan.

Nian husu ba Sekretáriu Estadu Komunikasaun Sosiál katak ho mundu globalizasaun ne’ebé maka’as tebes ne’e bele redus buat ida ne’e ka lae ka iha regra ruma ne’ebé bele regula asuntu ida ne’e ka lae.

Hatán kestaun ida ne’e, Sekretáriu Estadu Komunikasaun Sosiál, Merício Akara, hateten Sekretaria Estadu Komunikasaun Sosiál nia área ida maka oinsá atu bele aplika regulamentu atu bele prevene uza mídia sosiál la tuir étika.

“Iha duni ona hanoin atu halo jestaun ba uza mídia sosiál tanba preokupasaun mai barak. Iha opsaun rua ka tolu ne’ebé atu hahú dezenvolve. Ida maka Lei Rádiufuzaun. Rua, Informasaun no Transasaun Eletrónika no ikus Edukasaun Ba Internet Saudável,” nia esplika.

Nia promete katak tinan oin iha ona ezbosu kona-ba Rádiufuzaun nune’e bele regula espasu públiku (frekuensia sira), katak, sé maka uza tenke iha lisensa no kritéria mós tenke maka’as tanba espasu públiku ne’e Estadu nian.

Akara hatutan, iha tan lei kona-ba atu regula mídia sosiál maka hanaran “Informasaun no Transasaun Eletrónika” tanba hanesan Bispu dehan katak ema balun uza ID Falsu hodi lansa informasaun falsu “hoax”.

“Ita presiza iha lei atu buka tuir sé maka halo “hoax” tanba ne’e krime, inimigu ba ema hotu no la eduka ema,” nia subliña.

Governante ne’e informa katak presiza mós uza aspeitu seluk maka edukasaun liu-liu “Edukasaun Ba Internet Saudável”, katak, edukasaun refere tenke hahú iha Ministériu Edukasaun inklui Igreja Katólika atu hanorin matéria ida ne’e para ema bele utiliza internet ho matenek (edukativu).

Jornalista: Xisto Freitas | Editór: Manuel Pinto 

Imajen: Sekretáriu Estadu Komunikasaun Sosiál, Merício Akara, vizita Bispu Dioseze Maliana, Don Norberto Amaral, hodi husu Don Norberto nia hanoin kona-ba dezenvolvimentu mídia komunikasaun iha Timor-Leste. Imajén Ajénsia Tatoli/Xisto Freitas