DILI, 05 outubru 2020 (TATOLI) - Xefe Estadu Maior FALENTIL- Forsa Defeza Timor-Leste (FFDTL), Majór Jenerál Lere Anan Timur, hateten juventude ne'ebé mak iha interese aban bainrua sai atu lideransa ne'ebé maka di ' ak tenke estuda didi'ak tanba futuru nasaun Timor-Leste nian iha juventude nia liman.
Majór Jenerál Lere Anan Timur hatutan, nasaun nia futuru iha juventude nia liman tanba lidér jerasaun tuan sira-nia luta tinan barak nia laran, agora hetan ona ninia rezultadu mak ukun rasikaan no sira sei entrega ba jerasaun foun sira-nia liman halo dezenvolvimentu.
“Ba jerasauan foinsa’e Timor laran tomak hanesan bain-bain lider sira dehan katak Timor-Leste nia futuru iha imi-nia liman. Tanba ami-nia idade avansa daudaun, ami entrega ba joven sira mak sei responsabiliza Estadu no nasaun ne’e iha future. Tanba, ami maka harii nasaun ona, tanba ne’e bainhira ko’alia dehan futuru iha juventude nia liman, ne’e responsabilidade ne’ebé maka boot. Tanba, hanesan uma ida karik ita harii uma di’ak ona, imi foinsa’e maka tau matan ba uma ne’e rasik,” dehan Majór Jenerál Lere Anan Timur ba Jornalista sira, iha serimónia treinamentu Lideransa nian ba Joven sira ne’ebé realize hosi Rotary Youth Leadership Awards Timor Lorosa’e (RYLA-TL), iha Fatin Unio Maloa Training Center, Semináriu Ailok-Laran, Dili, segunda ne’e.
Nia hateten, esperiénsia lideransa nian ba juventude sira haree ba situasaun uluk, lideransa ne’ebé ladun iha koñesimentu ba luta nian maibé sira ha espíritu nasionalizmu hodi manan funu. Tanba ne’e, agora TL ukun-aan ona, esperiénsia ne’ebé sira iha fahe ba juventude sira-ne’e, atu nune’e futuru joven sira bele dezenvolve nasaun ne’e ho di’ak.
“Ha’u mós uluk foinsa’e hotu. Tanba ne’e, bainhira mai hamutuk ho joven sira, fahe esperiénsia ba sira, atu sira komprende katak sai lideransa ne’e tenke matenek no hatene jere iha futuru mai,” Lere Anan Timur hateten.
Tanba ne’e, Lere Anan Timur apela ba foinsa’e sira labele baruk estuda maibé esforsu-aan la’o ba oin atu buka esperiénsia barak kona-ba lideransa nian atu nune’e bele dezenvolve nasaun TimorLeste ho di’ak.
Jornalista: Osória Marques | Editór: Cancio Ximenes
Sem comentários:
Enviar um comentário