BOLSA MÃE IHA TENDENSIA HAFAHE FAMILIA

Programa bolsa da mãe, Governu iha tendensia atu hafahe (divorsiu) familia ida-idak, tanba programa ne’e ba deit elementu balu iha familia ida nia laran.

“Hanesan ne’e, signifika ita maka divorsia fali familia sira liu husi programa sira ne’e,”dehan Rui Araújo ba jornalista sira Sabadu (16/5) iha Largo Lecidere Dili, hafoin halo selebrasaun loron mundial familia.

Rui Araújo afirma, Governu sei haka’as an atu tau familia nu’udar sentru ba programa dezenvolvimentu, ne’ebé hala’o iha Timor Leste nia laran.

Nia hatutan, Governu persija reve fila-fali nia pensamentu kona-ba dezenvolvimentu, tanba durante ne’e, sempre koalia barak kona-ba programa dezenvolvimentu tenke ba em hotu.

Xefe Governu ne’e fó ezemplu katak, hanesan programa bolsa da mãe no merenda escolar ne’e, targetu ba elementu iha familia nia laran deit hanesan, labarik ho feto.

“Ita iha tendensia atu fokaliza iha nia programa ka projetu dezenvolvimentu, ba diet elementu balu husi familia, hanesan fó apoiu ba inan liu husi bolsa da mãe, apoiu merenda escolar, nomós programa espefiku, ba inan no labarik sira. sorti seidauk mosu tan programa ba bolsa do pai, ka programa espesifiku ba pai. Tanba se ida ne’e maka mosu duni karik, ita valkaniza ka fahe tiha falimilia ne’e ba pedasuk lubun ida,”katak Rui Araújo.

Entaun Rui Araújo dehan, ba futuru Governu sei halo programa atu fó apoiu ba familia tomak iha uma kain ida nia laran.

Xefe Governu ne’e haktuir, ida ne’e maka dezafiu ida ne’ebé maka nia lansa tiha ona, i Governu sei refleta maka’as kona-ba ida ne’e.

Nia hatutan, Governu tenke re-orienta nia program ka projetu sira atu apoia familia, nu’udar nukliu de atensaun principal iha sosiadade nia laran.

Rui Araújo haktuir, atensaun principal ne’e, atu nune’e, liu huis familia, Estadu bele atinji ninia elementu ida-ida, hanesan labarik, feto ka inan sira, nomós mane ka aman sira.

Hanesan ne’e maka, Estadu liu husi Governu, bele konsege hamosu kondisaun atu familia ida-ida, bele dezenvolve sira nia an, hodi sai forte, no ikus mai, haforte mós nasaun Timor Leste.

Rui Araújo hatutan, iha aspeitu ida ne’e, Governu hahu ona programa saúde iha familia, nu’udar forma ida atu implementa atensaun primaria saúde iha komunidade nia le’et, hodi tama liu husi familia, nu’udar nukliu ba atensaun saúde nian.

“Ita hein katak, bainhira ita selebra loron internasional familia, iha tinan 2016, husi inisiativa ida ne’e, familia balu iha nasaun ida ne’e nia laran, bele hetan dadauk ona atensaun primaria saúde, liu husi forma integrada ida, nu’udar nukliu iha ita nia sosiadade nia laran,”katak Rui Araújo

Nia esklarese, dadus estatistikus Timor Leste nian, hatudu dehan katak, iha Timor laran tomak, iha       177 mill familias, no iha kapital Dili deit, iha 48 mill familias. Tanba ne’e, kuandu Estadu liu husi Governu reorienta nia atensaun ba iha nukliu familiar, nasuan ida ne’e sei hetan rezultadu diak liu, husi programas dezenvolvimentu.tap

Jornal Nacional