Timor-Leste anunsia reuniaun CPLP nian kona-ba seguransa alimentár iha novembru iha Díli

Ministru Agrikultura no Peska, Estanislau Aleixo da Silva, anunsia horisehik katak Komunidade Nasaun Lia-Portugés (CPLP) sei realiza reuniaun ida kona-ba seguransa alimentár, iha novembru, iha Díli.

"Tanba ami prezidi CPLP, ami haruka ona proposta ba nasaun balun - no Brazil konfirma ona katak bá -, iha realizasaun reuniaun ida kona-ba seguransa alimentár, ne’ebé hanesan mós tema importante ne’ebé debate bebeik iha CPLP, no ami sei iha reuniaun ida iha novembru tinan ne’e", tenik Estanislau Aleixo da Silva.

Governante Timor-Leste ne’e,  anunsia mós iha finál reuniaun estraordináriu daruak ministru sira Asuntu Tasi nian, horisehik, iha Lisboa, intensaun hodi hala’o reuniaun ida ministru sira Tasi nian, "iha maiu tinan oin, iha mós Díli, molok ka hafoin reuniaun ministru sira Defeza nian".

SAPO TL ho Lusa - Foto: Samuel Soares @SAPO TL