Tribunál timoroan hasai portugés nebe detidu tanba suspeita halo brankeamentu kapitál

Tribunál Rekursu iha Díli, Timor-Leste, muda ona medida koasaun ba portugés Tiago Guerra, nebe hetan prizaun preventivu tanba suspeitu halo brankeamentu kapitál sira nian, ba Termu Identidade Rezidénsia, haktuir hosi fonte defeza iha loron-tersa ne'e.

Fonte hanesan hatete ba ajénsia Lusa katak desizaun ne'e fó sai iha loron-tersa loraik no Tiago Guerra, nebe hetan detidu hahú hosi fulan-Outubru, sai tiha ona no agora iha nia belun sira nia uma.

Husik tiha sidadaun portugés liutiha oras balun hafoin hetan vizita hosi Primeira-Dama timoroan, Isabel da Costa Ferreira, no hafoin kampaña sensibilizasaun ida nebe halo hosi família no belun sira.

Kampaña ne'e hamosu asaun oioin diplomátiku no polítiku sira iha fulan ikus ne'e.

Iha loron-segunda, ministru Estadu no Prezidénsia hosi Konsellu Ministru sira Timor-Leste nian, Agio Pereira, hatete katak justisa timoroan halo hela buat hotu nebe bele hodi konklui prosesu judisiál Tiago Guerra nian.

"Ami hatene katak ami nia área Justisa, liuliu iha ámbitu Prokuradoria-Jerál Repúblika nian, halo hela buat hotu, nebe bele, hodi hakotu prosesu ne'e", Agio Pereira hatete ba Lusa bainhira hakotu konferénsia ida iha Lisboa.

Tiago Guerra, suspeitu ba krimi brankeamentu kapitál sira nian, hetan kaer iha Díli, hamutuk ho nia feen, iha loron 18 fulan-Outubru 2014.

Portugés hetan prizaun preventivu lahó akuzasaun formál no nia feen, Chan Fong Fong Guerra, hetan Termu Identidade no Rezidénsia (TIR), labele sai hosi Timor-Leste.

Lei timoroan nian hatete katak prizaun preventivu bele aplika durante tinan ida ho balun, bele renova ba tinan ida bainhira iha kazu sira nebe kompleksu.

"Prosesu ne'e iha ámbitu prosesuál justisa nian. Ha'u ko'alia tiha ona ho nia (Tiago Guerra) nia aman sira iha-ne'e (iha konferénsia iha Lisboa). Ita hotu hanesan ema moris, ami senti sensibidade nebe kestaun prosesuál sira afeta família sira", Agio Pereira subliña.

"La'ós hanesan prazer ba ami nia Estadu mantén ema sira iha kadeia lahó justifikasaun no ami hein katak prosesu investigasaun ne'e sei hotu lalais", ministru timoroan ne'e hatutan.

Hanesan ofisiál, no tuir prokuradór-jerál timoroan, José Ximenes, hatete foin lalais ne'e ba Lusa, katak Tiago Guerra hanesan suspeitu ba krimi brankeamentu kapitál sira nian ho "faktu sira nebe akontese iha nasaun oioin".

SAPO TL ho Lusa