MAP TENKI TAU ATENSAUN BA IRIGASAUN

Reprezentante povu iha Parlamentu Nasionál (PN) husu ba Governu liu husi Ministériu Agrikultura no Peskas (MAP) atu tau atensaun ba irigasaun iha Suku Seical Postu Administrativu Baucau Vila Munisípiu Baucau.

“Wainhira ami hala’o kontaktu eleitorál, Xefi Suku Seical hato’o nia preokupasaun konaba irigasaun ne’ebé bo’ot tebes iha Suku Seical,” hateten deputada Ana da Conceição Ribeiro iha PN foin lalais ne’e.

Deputada husi Bankada FRETILIN ne’e afirma katak, irigasaun hamutuk 4 hanesan Kasameta, Sobabere, Ososege, Darisi.

“Irigasaun 4 ne’e husu ba Governu presiza tau atensaun, tanba irigasaun Casameta, iha tinan kotuk, tuir lolos Ajénsia Dezenvolvimentu Nasion’al (AND) atu ba halo avaliasaun ba iha terrenu atu tau moru de protesaun, maibé iha tinan kotuk la konsege hala’o”, dehan nia.

Tuir Ana Ribeiro katak, sé Governu la tau atensaun, nune’e udan mai bele estraga hotu povu sira nia natar, basa irigasaun Sobabere ne’e irigasaun ne’ebé forñese bee ba iha Suku 6 hanesan, Buibau, Caibada, Buruma, Bahú, Samalari nomos Suku Seical.

Deputada Ana Ribeiro salienta katak, durante tinan 5 ona suku 6 ne’e la halo natar, tanba irigasaun Sobabere irigasaun komu la forñese.

“Entaun povu sira ne’e la halo sira nia natar, irigasaun Ososege agora dadaun nia basadeira maka aat, tanba ne’e husu ba Governu tau matan atu nune’e iha tinan oin sira bele halo fila fali sira nia natar”, nia esplika.

Reprezentante povu ne’e informa katak, Xefi Suku Seical mós rekomenda ba Governu atu tau matan ba irigasaun refere, tanba Suku Seical hanesan sentru ba produz haree.

“Mas se irigasaun maka ita la tau matan, querzer povu nia natar sira ne’e mós abandonadu,”dehan deputada Ana Ribeiro.

Iha fatin hanesan Deputadu Felisberto Monteiro Guterres mós fundamenta katak, iha vizita eleitorál ba suku Bahamori, Postu Administrativu Venilale, komunidade husi Bahamori, sira hato’o difikuldade liga liu ba iha irigasaun.

“Ha’u atu hatete deit katak, natar iha Galata kuaze 500 hektar liu ne’ebé maka sira iha, primeiru sira liga liu ba iha irigasaun, oinsa husu ba estadu para atu bele hadia sira nia irigasaun, i depois iha tinan ida nia laran sira hakarak halo natar dala rua,” dehan deputedu bankada FRETILIN ne’e.

Deputada Felisberto Guterres salienta katak, komunidade sira husu ba MAP, atu ajuda mákina dulas haree, tanba sira hakarak atu produz haree no koko atu fa’an iha merkadu tradisionál.

Hatán preokupasaun sira ne’e hotu Sekretaria Estadu Asuntu Parlamentar Maria Terezinha Viegas hateten katak, relasiona ho preokupasaun ne’ebé deputadu sira foti, liu liu irigasaun ba iha Suku Seical ninian, nia parte hato’o ona ba iha Governu, maibé felismente seidauk iha resposta por eskritu.

“Ami sei kontinua em caminha hikas fali, atu nune’e MInistériu bele hola konsiderasaun no fó atensaun, liu-liu implikasaun ba iha natar ne’ebé maka ita nia povu labele kuda,”tenik Terezinha Viegas.eni

Jornal Nacional