RETORNU FUNDU PETROLIFRU US$ 556 MILOENS

Governador Banku Central, Abrão Vasconselhos informa katak, retornu fundu petrolifru nian, husi periodu fulan Janeiru to’o Juñu tinan ida ne’e, negativu oit oan, tanba hetan deit US$ 556 miloens.

Maibé Abrão Vasconselhos dehan, fundu mina-rai ne’e, hanesan fundu ida ne’ebé indeterminadu, entaun labele haree de’it ba prespetiva ida fulan tolu ninian ne’ebé hatudu retornu negativu.

Bainhira haree husi fulan Janeiru to’o Juñu hetan rendimentu ho total bruto US$610 milloens, maibé net ne’e US$ 556 milloens.

“Ida ne’e mak ita hetan income husi atividade investimentu fundu petróleu ne’e hamutuk US$ 556 milloens. Ida ne’e ohin hau dehan negativu ne’e, periodu ida fulan tolu nian,”informa Abrão Vaskonselhos ba jornalista sira, hafoin Banku Central Timor Leste lansa relatóriu trimestral ninian kona-ba fundu petrolifru nian, Kinta (06/8).

Banku CentraL Timor Leste lansa relatóriu trimestral fundu petroleum ninian, ba period ne’ebé determina iha loron 30 Juñu 2015, hanesan relatóriu ne’ebé mak desponibiliza ba ema hotu atu asesu.

Total Fundu Petroleum to’o iha loron 30 fulan Juñu tinan 2015 nian hamutuk Billaun US$ 16,862 biloens.

“Total reseitas ne’ebé mak ita nia fundu simu durante segundu trimestre 2015 nian ne’e mak hamutuk US$ 295 milloens, inklui royalties ne’ebé iha relatóriu US$113 milloens, no husi kontribuintes sira husi kompaña sira ne’ebé halo operasaun no royalte ne’ebé husi ANP (Autoridade Nasionál Petróleu) hamutuk US$ 181 milloens de dollares,”

Abrão afirma, iha tinan ida ne’e to’o iha 30 de Juñu, total rendementu lick, ne’ebé mak Timor Leste nia fundu hetan, hamutuk US$ 556 miloens.

“Ita labele konta deit hanesan, fulan tolu oin mai, ita hetan tan fali liu ida ne’e. la’os hanesan ne’e, tanba merkadu la’os hanesan, merkadu sempre lahanesan iha periodu nia laran,”katak Abrão.

Governadór ne’e hatete, la’os Timor Leste mak infrenta retornu negativu, maibé investor barak iha mundu mós infrenta, tanba merkadu rasik mak monu.

“Merkadu ne’e rasik monu, laiha buat ida mak ita presiza preokupa tanba saida, ninia referensia hanesan iha relatóriu ne’ebé indika ninia bens mark rasik monu kuaze kuaze 0,16% no ninia portofolio ne’e menus kuaze 0,14,”afirma Abrão.

Nia haktuir, diferensa entre ninia bens mark ne’e, hanesan sasukat ida ne’ebé mak atu sukat ninia dezempeñu ho bens mark ida ne’e. nia esklarese, ema labele kestiona kona-ba politika investementu fundu petroleum ne’e rasik, tanba ida ne’e hanesan kestaun merkadu nian rasik, ne’ebé mak infelismente iha period ida, nia la afavor ba ida.

“Trimestre ida termina iha Jullu interesante tebes, ha’u hanoin kuandu ita haree de’it ba periodu ida deit, i ita haree husi fulan Abril, Maiu Juñu de’it total retornu ne’e ita iha negativu US$ 15 milloens. Ida ne’e mai husi retornu investimentu ne’ebé mak ita hetan la bo’ot liu,”relata Abrão.

Governadór ne’e esplika, investementu ne’e ki’ik liu husi realizasaun evaluasaun ba ativu finanseiru ba instrumentu ne’ebé mak investe menus husi millaun US$ 203 miloens.

Nune’e Timor-Leste ninia movimentasaun iha moeda ne’ebé investe iha moeda estranjeirus (la’os iha dollar amérika) iha kuartel ne’e de’it hamutuk US$ millaun 92 ho pozitivu.

“No entanto ninia total final ne’e US$ 15 milloens, entaun retornu ne’e kiik, negativu, mas ita nia fundu petróleu ne’e presiza atensaun, ita la’os investór kurtu prazu, maibé ita ne’e hanesan long part invester (investe ba tempu naruk). Ita nia fundu ne’e ita la espera dehan tinan oin atu hotu,”tenik Abrão.cos

Jornal Nacional