Literasia finanseira no konta poupansa TL ki’ik

DÍLI - Banku Central Timor-Leste (BCTL), sesta (28/08), lansa programa rua tuir planu estratejia nasional mak kampaña literasia finanseira no konta poupansa. Programa rua ne’e nudar politika ida eduka sosiadade tomak iha Timor-Leste atu bele iha koñesimentu kona-ba finanseira iha nia moris no halo poupansa hodi bele hadia ekonomia Timor-Leste.

Governador BCTL Abrão Vasconcelhos iha serimonia lansamentu programa ne’e hatete  agora dadaun nivel poupansa iha Timor-Leste ladun boot. Partisipasaun populasaun ninian atu utiliza serbisu bankaria hanesan konta poupansa sei minimu iha nivel ne’ebé sei ki’ik. Abrão afirma katak oras ne’e dadaun BCTL foin mak dezenvolve sistema. “Ita hahu ona programa ida ne’e importante oinsa mak atu fo koñesimentu laos deit ba labarik sira maibe mos ba iha sosiadade tomak hanesan inan-aman, kontribuisaun husi mestri sira, husi ukun nain sira  no ita sosiadade tomak iha kontribuisaun oinsa mak melhora (hadia) nivel poupansa iha nivel nasional,” dehan Governador BCTL Abrão de Vasconcelos ba BT iha nia knar fatin, Acait, Díli, Sesta (28/08).

Atu promove programa literasia finanseira no konta poupansa ne’e sei orienta banku komersiu sira atu bele fo apoiu. Nia dehan maski banku sira halao investimentu boot iha kualker inisiativa ne’ebé mak sira halo sira sente hanesan peju ba sira uituan ka maka’as. Ida ne’e afeta ba ema atu baruk halo konta popupansa ka rai osan iha banku. “Tanba ne’e saida mak sira halo, sira kobra fali kustu husi kliente sira, entaun ida ne’e halo dizensitiva populasaun sira atu rai osan tanba hanesan ohin dehan populasaun sira tau osan iha banku enves simu funan maibe koa ita nia osan to’o hotu. Ida ne’e situasaun ida ne’ebé mak realidade ita infrenta tanba ne’e mak banku sentral hahu ho programa ida ne’e laiha enkargus ba iha konta ida ne’e,” nia afirma.

Tuir nia katak xave ema atu halo poupansa mak primeiru haree ba iha nivel rendimentu hanesan Timor-Leste nian nivel rendimentu ki’ikoan tebes maibe lasignifika dehan ho situasaun  hanesan ne’e mak hanoin  atu hasae nivel rendimentu iha futuru liu husi programa ne’ebé mak agora prepara. “Se ita laiha abitu atu rai osan no la hanorin labarik sira atu rai osan to’o iha futuru mai sikun ida ne’e sei kontinua nafatin no ita laiha meus atu melhora ekonomia, melhora ita nia familia, melhora ita nia moris no ninia xave principal mak oinsa ema atu tau osan tenke iha jestaun ba asuntu finanseiru,” afirma governador ne’e.

Nia hateten iha familia laran xave ba iha halo poupansa hotu-hotu importante no poupansa labele haree deit ba iha konta bankaria ne’e tanba poupansa iha aspeitu hot-hotu. “Ita deside atu labele sosa sasan ida ne’ebé mak importante maibe ita lapresiza no sasan ida ne’ebe mak presiza maibe la importante, ida ne’e disizasaun iha laran no ida ne’e atu iha mentalidade atu poupa,” hateten Abrão. Nia infroma katak oras ne’e dadaun kona-ba populasaun iha Timor-Leste tuir numeru asesu ba sistema finanseiru hamutuk mais 300.000 no 54% husi populasaun adultu (joven) ema tinan 15 ba leten iha konta bankaria.

“Espera ita ho inisiativa hanesan ne’e  ita bele hateten iha tinan 2 ou 3 tuir mai nivel ida ne’e sei bele muda,” dehan nia. Liu husi media Abrão husu ba populasaun sira liu-liu ba inan-aman, mestri sira atu fo nafatin informasaun ba oan sira no mos ba iha komunidade enjeral atu hamosu kultura poupansa, tanba presiza kontinua beibeik nafatin atu hamosu mentalidade ida rai osan tanba ida ne’e halo TL  nia situasaun finanseiru fasil atu jere iha futuru oin mai no labarik sira kaer papel importante iha sosiadade iha futuru oin mai.

Nia esplika, lansamentu kona-ba literasia finanseiru iha Timor-Leste ne’e oinsa atu fornese hodi hadia nivel literasia finanseiru ba populasaun no hadia sira nia kapasidade atu jere asuntu finanseiru pesoal. Nia dehan planu diretore ba setor finaneiru ba tinan 2014 – 2025 observa katak literasia finanseiru ne’ebé mak tun (baixa) inklui mos falta koñesimentu kona-ba numerais no falta familiaridade ho konseitu no institusaun finanseiru sira. Ida ne’e nudar obstaklu prinsipal atu bele atinji taxa ne’ebé aas ba inkluzaun finanseiru iha Timor-Leste.

Asaun politika balu iha planu diretór ba setor finanseiru mak BCTL atu establese estratejia no programa ida atu hasae litererasia fianseiru entre grupu vulneravel sira. “Iha loron 29 novembru ita sei asiste fila fali loron nasional poupansa no oras oras tan ita sei partisipa husi Ministeriu Edukasaun sei lansa planu estratejia nasional kona-ba literasia finanseiru Timor-Leste nian,” dehan Governador Banku Central Timor Leste Abrao de Vasconselos iha nia diskursu iha edifisiu BCTL, ACAIT, Dili sesta (28/08).

Nia afirma katak planu estratejiku nasional ba periodu 2016-2020 dezenvolvido ona liu husi reuniaun konsulta no diskusaun ho perte interesada oin-oin. Iha apoiu boot tebes ba planu estratejiku nasional refere tanba partikularmente seitor banku komersial sira espera ona iha interese boot atu fo apoiu atu oinsa pastiripa iha diskusaun sira nudar estratejia Nasional atu dezenvolve an.

Abrao dehan atu foka ba iha PEN refere iha area lima  mak hanesan dezenvolve kapasidade no potensialidade setor, fornese lideransa, kobre alvu audiensia sira, mantein kualidade no kompartilha ba buat ne’ebe mak halo. Estratejia ne’ebe sei apoiu literasia finanseira ne’ebe mak boot ida iha komunidade Timor Leste. Nia dehan nudar primeiru pasu BCTL iha ona papel lideransa atu introdus kompaña nasional ba  sensibilizasaun edukasaun finanseiru ho objetivu atu fornese edukasaun finanseiru baziku ida ba ema sira ne’ebe laiha konta bankaria no ema ne’ebe rendimentu kiik ho objetivu atu hadia sira nia koñesimentu, abilidade no atetude finanseiru ho nia impaktu atu sei promove kresimentu ekonomia rai no pais nian.

“Ohin ita lansa programa rua ne’ebe ita asiste, ida ne’e hanesan kontinuasaun programa ne’ebe halao iha tinan kotuk, iha tinan kotuk hafoin lansamentu husi Banku Central ne’ebe hetan tulun husi funsionariu banku komersial sira sai hanesan fasilitador hodi visita tiha ona  munisipiu 10,” katak nia. Nia dehan tan katak  programa ida ne’e fasilitator sira aprezenta material lubuk ida oinsa hanorin labarik sira, grupu negosiu kiik sira, funsionariu publiku no besik ema rihun ida resin mak partisipa iha enkontru ne’ebe mak fasilitor sira realiza iha munisipiu no iha fulan oin kontinua halao iha Oecusse no taka iha Dili iha fulan outubru tinan nee.

Tan ne’e atu asegura PEN refere sei implementa tuir visaun no misaun no objetivu, sei iha revizaun perioridade ba estratejia nia no alterasaun se halo karik apropriadu. Nia informa tan katak iha tinan kotuk Presidente Republika Taur Matan Ruak ofisialmente lansa kampaña sensibilizasaun edukasaun finanseiru. Programa refere involve estudantes liu rihun ida ne’ebe partisipa iha lansamentu tinan kotuk. Programa refere Presidente Republika deside loron 29 Novembru hanesan loron poupansa nasional.

Iha fatin hanesan Vice Ministra Edukasaun Dulce Alves hato’o obrigadu ba BCTL ne’ebe ho programa importante tebes relasaun servisu Ministeriu Edukasaun nian. “Ministeriu Edukasaun retira fila fali deit importansia edukasaun ho literasia finanseira  tanba hau hakarak foti uluk liafuan literasia ne’ebe nia relasaun boot teb-tebes ho edukasaun signifika katak ema ida tenke hatene lee no hakerek hodi nune’e bele komprende literasia finanseira,” dehan Dulce.

Nia dehan ministeriu edukasaun oras ne’e hadia ona kurikulum eskolar tanba iha kurikulum refere emprimi forma ida ne’ebe mak simples teb-tebes kona ba moeda ne’ebe mak Timor Leste iha no labarik sira gasta tuir sistema management hodi rai osan hanesan iha banku. Tan ne’e nia dehan Ministeriu edukasaun pronto nafatin fo maneira ne’ebe diak ba iha estudante sira kona ba oinsa bele iha kuinesementu ba iha literasia finanseiru ba iha estudante sira liu husi profesore sira.

Nia mos husu ba iha publiku katak atu eduka labarik sira iha kuinesementu ba iha literasia no finanseiru importante mak lideransa sira tenke sai ezemplu dahulu hodi bele labarik sir abele nate tuir dalan ne’ebe mak iha. Iha serimonia lansamentu Planu estratijia Nasional Kona ba Literasia Infanseiru partispa husi Premeira Dama, MCIA, Ministeriu Edukasaun,Administrador, Diretor Banku Comersio sira, Profesores nomos konvidadus sira besik ema atus tolu resin.(BT)

Business Timor