RELATORIU KILAT LAKON IHA KRIZI 2006 ENTREGA ONA BA GOVERNU

Relatoriu Investigasaun ba Kilat lakon iha krize tinan 2006 ne’ebe hala’o iha tinan 2011 husi Ministeriu Defeza no Seguransa (MDS) entrega ona ba Governu.

Komandante Jeral Polisia Nasional Timor Leste (PNTL) Komisiariu Julio da Costa Hornay informa, relatoriu intrega ona ba iha Governu, Governu atu desidi halo nusa ne’e depende ba membru Governu antes nian ne’e mak hatene.

“Ida ne’e uluk ami aprejenta tiha ona ba Governu rejultadu Investigasaun Governu depois mak Governu iha ne’eba desidi halo nusa, nusa ne’e membrus Governu tempu ida ne’eba nian mak responsabilidade,” dehan Julio Hornay ba Jornalista sira iha Edifisiu Ministeriu Interior, Kaikoli, Segunda (31/08/2015).

Nia reforsa liutan katak, rejultadu inkeritu iha tempu ne’eba intrega hotu ona ba Governu ne’ebe mak ukun iha tempu ne’eba.

Iha parte seluk, antes ne’e Organizasaun Non Governamental Fundasaun Mahein (FM) husu ba Governu atu loke fali relatoriu investigasaun ne’ebe mak halao hosi MDS iha tempu Governasaun Aliansa Maioria Parlamentar (AMP), tanba ema ne’ebe mak indika iha relatoriu investigasaun ne’e to’o agora sei kontinua ativu no sae tan divija.

Tuir Adjuntu Diretor FM João Almeida dehan, presiza loke fali investigasaun ne’ebe mak halao ona iha tinan 2011 nian ne’ebe mak indika ona ema balun iha ne’eba, nia fiar katak iha ne’eba bele hatene ona kilat ne’ebe mak lakon ne’e iha se nia liman.

“Ha’u rekomenda deit atu bele loke fali investigasaun ba relatoriu investigasaun MDS nian iha tinan 2011 nian iha ne’ebe indika ona ema balun iha relatoriu ne’e hau fiar ita sei hatene kilta ne’e iha sé,” dehan João foin lalais ne’e.

Kilat ne’ebe mak lakon iha krize tinan 2006 ne’ebe mak to’o oras ne’e seidauk hetan hamutuk 16. Eus

Jornal Nacional