TILMAN HUSU MANIFESTANTES MUDA ASUNTU, PENSAUN VITALISIA LAOS URJENTE

DILI - Eis deputadu Manuel Tilman hatete, kestaun pensaun vitalísia la’ós urjente, di’ak liu-hosi estudante sira muda asuntu hodi halo demonstrasaun.

“Estudante sira iha direitu halo manifestasaun, mas asuntu ida pensaun vitalísia ne’e la’ós urjente, tanba hosi parlamentu iha ona proposta hosi Partidu Demokratiku. Konforme esplikasaun hosi Vise Prezidente, Aderito Hugo katak lei la’ós urjente tanba nia aplikasaun ne’e, kuandu aprova iha 2016, ninia aplikasaun só tama em vigor 2022, tanba tenki liu lai mandatu ida 2017 ne’e”, Tilman ba jornalista sira iha nia kna’ar fatin Praia dos Coqueiros, Tersa, (29/9).

Nia dehan, Vise Prezidente PN anunsia, meja parlamentu ho partidu haat ne’ebé iha asentu deside proposta PD nian hodi hein proposta hosi CNRT, FRETILIN inklui Frente Mudansa.

“Karik proposta PD mak liu, signifika iha buat tolu iha ne’e, mandate deputadu nian atu hetan direitu ba pensaun ne’e tenki ser tinan lima. Tinan lima ne’e dehan katak kumpri mandatu ida kompletu, entaun tinan lima oin mai, hahú hosi 2017 to’o 2022, entaun ezijensia estudante sira mamuk”, nia tenik.

Tilman rona ona, proposta PD ne’e la-simu pursentu 100 ba pensaun, maibé simu de’it pursentu 75 de’it hosi salariu atual. Nia parte sente preokupadu tanba proposta ne’e define eis titulares ida ho tinan 60 ka la’e.

“Iha momentu ne’ebá, minimu tenki ser hetan mandatu tinan lima, depois valor ne’e pursentu 75 hosi salariu atual, tinan ne’ebé ke hahú ezerse ninia direitu atu simu ne’e tinan 60 korresponde ho ba idade jerál reforma”, nia dehan tan.

Tilman hatutan, bainhira alterasaun ba lei refere sai nune’e, estudante sira tenki rona. Tuir nia, estudante sira atu fó fali ultimatum ba órgaun soberania hanesan PN la-loos. Tanba povu TL la’ós de’it mak estudante sira ne’ebé oras ne’e halo demonstrasaun.

“Agora povu sira iha foho ne’ebá ne’e la-rona, ba rona mak persentajen estudante ki’ik-oan ne’e. Sira halo manifestasaun ba lei rai nian karik ha’u apoia katak, nusa mak lei rai ne’e la urjente, ema oho malu tanba hadau malu rai”, nia realsa.

Tilman fó hanoin ba estudante sira di’ak liu muda asuntu hodi ejize ba estadu hodi define polítika klaru kona-ba frontreira marítima, lei antí korrupsan inklui lei defeza ba konsumidores.

Tanba sasan barak liu prazu mak kontinua eziste iha super merkadu iha territóriu nasionál, nune’e kriminaliza kestaun expire sira. Tilman laiha serteza ba rezultadu manifestasaun, tanba lei refere la’ós urjente atu diskute.

Tilman mós konsidera estudante sira menus informasaun, tanba proposta iha meja PN. “Ha’u husu ba estudante sira halo manisfestasaun ba, maibé mudansa asuntu ne’e ba lei de korrupsaun, lei antí korrupsaun mak tenki ser urjente, lei sobre rai nian, ejize ba parlamentu hodi halo lei kona-ba defeza konsumidór. Ida importante liu mak governu tenki deside pozisaun loloos kona-ba tasi Timor”, Tilman sujere.

Timor Post