Autoridade ZEESM Sosa Aviaun Komersiál

Timor-Leste la’os iha transporte terrestre no marítima de’it maibé la kle’ur tan sei iha mós transporte aeru. Autoridade Zona Espesiál Ekonomia Sosiál Merkadu (ZEESM) kolabora ho Ministériu Obras Públikas, Transportes no Komunikasaun (MOPTK) sosa ona aviaun komérsial ho marka Twin Otter ho série 400 atu fasilita komunidade sira hodi hala’o viajen domestikamente.

“Tempu badak aviaun foun ne’e sei to’o iha Díli no aviaun ne’e la’os atu prepara de’it ba seremónia tinan 500 Portugés tama iha Timor maibé aviaun ne’e sei uza viajen ba kampu aviasaun hirak ne’ebé agora governu Timor-Leste prepara ona hanesan kampu aviasaun Baucau, Suai, Maliana no Oe-Cusse,” Romaldo dehan ba Matadalan iha Aeruportu Internasionál Comoro, Kuarta (16/09/015).

Nia haktuir, aviaun boot-natón ne’ebé sosa hosi nasaun Canada ne’e ho kapasidade transporta passajeiru hamutuk ema na’in 18 de’it.

“Ha’u nu’udar ema téknika ha’u labele ko’alia polítika tanba orsida ema inventa maka barak. Ne’eduni, aviaun ne’e sosa ho orsamentu hira, ne’e só prezidenti ZEESM maka hatene no objetivu hosi hola aviaun ne’e prezidenti ZEESM maka bele esplika,”  Romaldo informa.

Iha parte seluk, Diretór Jerál Serbisu Korporativus, Edgar Sequeira Martins esplika katak bainaka sira ne’ebé sei partisipa seremónia tinan 500 ne’e sei iha opsaun rua. Bele hela direta iha Oe-Cusse no balun sei hela iha Díli depois transporta hosi aviaun.

“La kle’ur tan mós transporte ida ka rua sei mai ha Timor-Leste atu nune’e bele apoiu no fasilita bainaka sira,” Edgar dehan ba jornalista sira bainhira ramata inkontru iha  salaun Ministériu Estatal, Caicoli (15/09/015).

Nia haklaken, ne’e prinsípiu governu atraves autoridade ZEESM hodi prepara transporte aeru prinsipál atu atende seremónia tinan 500.

Entretantu, bainhira konfirma assuntu ne’e ba autoridade ZEESM iha edifísiu ZEESM Timor Plaza, Díli, Segunda (21/09/15), relasaun públika ZEESM ko’alia katak Prezidenti ZEESM, Dr. Marí Alkatiri seidauk bele ko’alia kona-ba aviaun ne’e tanba aviaun seidauk to’o mai.

“Aviaun seidauk to’o mai. Aviaun to’o tiha mai maka Prezidenti ZEESM ko’alia,” dehan fonte relasaun públika ne’e ba jornalista Matadalan.

Enkuantu, Vise Ministru Obras Públikas, Transportes no Komunikasaun, Inâcio Moreira hateten Prezidente  ZEESM iha inisiativa ida kolabora ho MOPTK hasai osan hosi Orsamentu Jerál Estadu (OJE) 2015 ho montante 7.2 miloens atu sosa aviaun hosi Canada.

“Aviaun ne’e sei to’o iha Timor-Leste fulan oin (Outubru), tanba kontatus ba negosiasaun la’o normál. Aviaun ne’e posível tula pasajeirus  20, konta ho pilotu na’in 2. Provizoriamente sei halo operasaun Díli–Suai, Díli-Oe-Cusse no Díli–Baucau,” Lia hirak ne’e hato’o hosi Vise Ministru Obras Públika, Transporte no Telekomunikasaun, Inâcio Moreira ba jornalista Matadalan iha nia kna’ar fatin, Merkadu Lama, Kuarta (23/09/15).

Atu garante transporte  aeru ne’e, nia dehan, governu sei prepara pilotu, airomosa no ofisina ba futuru.

“TL sei negósia ho governo Indonézia atu rejistu aviaun ne’e, atu hetan AOC. Maibé, atu prosesa dokumentus, TL hetan ona proposta hosi Austrália no Indonézia, atu rejistu tuir pedidu TL nian. Aleinde ne’e, assesora Gabinete Ministériu nian prepara ona ezbosu ida atu rejistu  aviaun ne’e.

Kona-ba pilotu, Inâcio dehan, sei kontratu ema hosi estranjeiru no prepara treinamentu mós ba pilotu timoroan na’in ualu (8) atu nune’e bele aseguru aviaun ne’e ho di’ak liu-tan.

Ba kestaun ne’e, Diretór Ezekutivu Asia Justice and Right (AJAR), José Luis de Oliveira katak Governu atu sosa aviaun ne’e ideia ida ne’ebé di’ak no nesesáriu duni tanba Oe-cusse situada iha viziñu Indonézia nia klaran.

Tanba ne’e, tuir nia, atu hametin integridade nasaun nian, meius sira hanesan komunikasaun no transportes necessáriu tebes. Nia dehan, sé Governu laiha planu atu dezenvolve meius komunikasaun ne’ebé intensivu liu bele hamosu situasaun ne’ebé hateten katak Oe-Cusse sente dook liu hosi munisípiu sira seluk.

“Mai ha’u, Governu presiza iha planu ne’ebé maka di’ak atu oinsá bele habadak distánsia entre Oe-cusse ho ita. Tanba ne’e, pontu ida ne’e ha’u aseita,” dehan José Luis ba Matadalan iha nia serbisu fatin, Farol, Díli, Kuarta (23/09/2015).

Nia dehan, presiza iha planu ne’ebé klaru kona-ba oinsá transporte marítima ne’ebe adekuadu nune’e povu bele sente fásil atu bele ba mai ka solusaun ida atu povu bele hetan asesu ba transporte terrestre ne’ebé liga Timor-Leste ho Oe-Cusse.

“Maibé, kona-ba atu sosa aviaun ba elite sira nian ne’e ha’u la aseita, tanba durante ne’e ita iha nasaun ida ne’e, nai ulun sira gosta sosa sasán ou transporte ba sira nia án rasik hodi la tau interesse ba povu,” Oliveira informa. (Mj8/Jon)

Matadalan