PADRE JOSÉ ANTONIO: LORON MATEBIAN HAMOS SALA IHA PURGATORIU

Padre (Pe), José Antonio da Costa hateten, loron matebian hanesan investigasaun ba matebian sira iha purgatoriu atu bele tama ba iha reinu lalehan.

“Ita harohan ba ita nia matebian sira ne’ebe sei hamos a’an hela iha fatin purgatoriu, fatin investigasaun nian atu bele tama iha lalehan lori ita hirak ne’e sei horik iha rai,”esplika Pe. Jose Antonio da Costa, liu husi nia homilia iha selebrasaun loron matebian iha Gereja Katedral Dili, Segunda (02/11).

Tanba ne’e, Pe. José Antonio da Costa dehan, ema sira ne’ebe sei moris iha rai maka bele harohan ba Maromak atu tulun matebian sira hodi bele hamos sala lalais atu bele tama iha reinu lalehan.

“Wainhira ita selebra matebian ne’e la’os loron atu tanis, maibe loron atu ita moris iha esperansa nia laran hodi hanoin katak, ema ne’ebe maka mate uluk ona sei fo tulun ba ema sira maka moris iha rai tuir Jesus nia programa bele ba moris hamutuk iha Jesus nia hanoin,”haklaken Pe. José Antonio da Costa.

Tuir observasaun JN-Diário nota katak, misa   ne’ebe maka hala’o iha Igreja Katedral Dili ne’e ladun hetan partisipasaun maka’as husi Sarani, tanba iha Igreja laran kadera balun mamuk hela no andar leten mos ema ladun iha.   Nune’e, hafoin misa remata ema ida-idak lori aifunan ba kari iha rate ba sira nia familia matebian ida-idak nian, no ba ema sira ne’ebe maka familia mate iha Munisipiu 12, sira tau deit aifunan iha Kruz bo’ot.

Hanoin hikas fali matebian

Nune’e mos, Padre Virgilio do Carmo hateten, loron 2 Novembro hanesan loron ida atu ema ne’ebé sei moris hanoin hikas fali liu husi orasaun ba tulun matebian sira ne’ebé maka liu ona ba mundo seluk.

“Loron matebian importante ba ita atu konvida sarani tomak hodi hanoin fila fali hodi haleu ita kari aifunan no susu lilin iha rate ba sira ne’ebe ita koñese nune’e mos ita lahatene no lakonese sira pesoalmente ne’ebe liu uluk ona ita ba iha mundo seluk ”Padre Virgilio Do Carmo hato’o lia hirak ne’e liu husi nia homilia banhira halo selebrasaun misa matebian iha Igreza Maria Auxiliadora Comoro, Dili, Segunda( 2/ 11/2015).

Nune’e mos Padre Virgilio dehan, tamba saida mak presiza hanoin matebian hirak ne’ebe liu ona ba mundo seluk? Ne’e tanba nudar ema iha ligasaun ho matebian sira maske sira mate.

Padre hatutan tan mate laos asaun ikus iha historia ema nian maibe ininsiu moris foun ida ho maromak.

“Ita selebra loron ne’e sai hanesan mahon ida ita refleta konaba realidade mate ninian ou loron ida ne’ebe ita dehan katak loron orasaun ninian furak tamba molok ita atu ba rate dader ita halibur hamutuk iha ne’e atu reza,”tenik Padre Virgilio.Avi/car

Jornal Nacional