BUKA TUIR FALSIFIKADOR DOKUMENTUS VETERANUS

Parlamentu Nasional (PN), liu husi Komisaun F ba asuntu Saude, Edukasaun Joventude, Desportu, Veteranus no Igualdade Jeneru, husu ba Ministeriu Solidaridade Sosial (MSS), atu buka tuir nafatin funsionariu sira ne’ebe deskonfia falsifika dokumentus veteranus nian.

Prezidenti Komisaun F PN, Virgilio da Costa Hornai hatete, Komisaun Homenagen tenke haree, la’os ema hot-hotu la iha imparsialidade iha ninia serbisu.

“Buat sira hamosu falsifikasaun no aumenta tinan partisipasaun, fo sasin falsu sira ne’e mos la’os buat ida hamrik mes-mesak katak, benfisiariu sira maka mai hodi foti lista hakerek rasik hodi asina hatama deit hodi hetan benefisiu ne’e la iha, iha ema ne’ebe serbisu iha ne’eba maka fasilita prosesu sira ne’e, entaun ministeriu tenke buka katak se-se maka kontribui hodi buat ida falsifikasaun dokumentus liu-liu iha tinan partisipasaun sira ne’e,” hateten Deputado bankada Partidu Demokratiku ne’e ba Jornalista sira iha Parlamentu Nasional, Kuarta (04/11/2015).

Virgilio dehan, benefisiariu sira ne’ebe simu ona sira nia direitu pensaun nudar subsidiu mensal ne’e, la bele orgullu deit. Hodi kontinua dehan tan se sira falsifika duni maka ema rona, ema hatene depois ema halo reklamasaun maka sira nia prosesu sira ne’e sei halo pendente.

Liga fali ba implementasaun lei, Virgilio esplika katak, aktu saida deit, inklui falsifikasaun dokumentus ne’e krimi.

“Buat ida falsifikasaun ne’e parte indisiu krimi ida, ne’ebe ministeriu maka tenke hare katak se ema ruma halo ona krimi, halo keixa ba Ministeriu Publiku hodi halo prosesu,” hateten Virgilio Hornai.

Antes ne’e, Vise Ministru Solidaridade Sosial (MSS), Miguel Manitelo hatete, ministeriu hasai funsionariu nain ida tanba falsifika dokumentus veteranus.

Eis Sekretariu Estado Joventude no Desportu ne’e hatutan, funsionariu nain ida ne’ebe maka ministeriu hasai husi Munisipiu Ermera. mia

Jornal Nacional