PR TAUR HUSU GOVERNU APOIA VIZITA SUKU

Primeiru Ministru (PM) Rui Maria de Araújo, informa katak, Prezidenti Repúblika (PR) Taur Matan Ruak husu ba nia (Rui Araújo, red) atu orienta ninia membru Governu sira atu fó apoia ba suku sira ne’ebé mak durante ne’e Xefi Estadu vizita tiha ona.

Rui Araújo hateten katak, liu-liu membru Governu sira ne’ebé toma konta ba área infraestrutura, saúde no edukasaun atu fó apoia ba vizita ne’ebé durante ne’e nia halo ba sukus hotu atu rona povu nia preokupasaun.

Primeiru Ministru, Rui Maria de Araújo informa katak, nia halo enkontru ho PR Taur Matan Ruak, tanba Governu sei iha reuniaun iha Oe-cusse, kona-ba preparasaun selebrasaun tinan 500, entaun Prezidenti Repúblika hakarak rona kona-ba preparasaun ba selebrasaun ida ne’e.

“Komu atu ba Distritu, Prezidenti husu mós ba membru Governu sira ne’ebé toma konta ba infraestrutura, ho buat sira seluk para atu fó apoiu ba vizita Prezidenti da Repúblika nian,”informa PM Rui Araújo ba Jornalista sira iha Palácio Prezidensiál Aitarak Laran Dili, Kuarta (04/10).

Nia haktuir katak, aban (ohin), komisaun ba akompaiñamentu ba rejiaun administrativa espesial Oe-cusse ninian, sei halo reuniaun iha Oe-cusse atu haree progresu implementasaun rejiaun administrativa espesiál ne’e to’o iha ne’ebé ona.

“Dia 6 mós, sei iha reuniaun para haree preparativus kona-ba serimonia tinan 500, enkontru duas kulturas Timor Leste ho Portugál,” informa Rui Araújo.

Alénde ne’e, PM Rui Araújo mós informa katak, enkontru ne’ebé durante ne’e halo iha Oe-cusse ne’e, la’os enkontru konsellu ministrus.

“Konsellu ministrus la halo reuniaun iha Oe-cusse, reuniaun iha ne’ebá ne’e, komisaun interministeriál, akompainamentu i koordenasaun implementasaun ba rejiaun administrativa espesial ninian,” katak Rui Araújo.

Xefi Governu ne’e esplika katak, wainhira lei hamosu rejiaun administrativu espesial Oe-cusse, iha ne’ebá Governu mós hamosu rezolusaun ida atu kria komisaun interministeriál ne’e atu akompaiña implementasaun ne’e la’o oinsa.

Ne’eduni, Rui Araújo esplika, durante ne’e reuniaun sira kona-ba komisaun interministérial ne’e, halo iha Oe-cusse.

Iha okaziaun ne’e mós, Rui Araújo informa katak, bainaka espesial sira ne’ebé mak konfirmadu ona atu mai partisipa iha selebrasaun tinan 500 ne’e mak hanesan, Prezidenti da Repúblika (PR) São Tomé e Príncipe, ho Primeiru Ministru (PM) Caboverde.

Governu mós, sei hein hela karta konfirmasaun ba nai ulun balun husi nasaun seluk, ne’ebé mak atu mai partisipa iha seremonia importante ne’e.cos

Jornal Nacional