Investor Dezempregu Tama Iha TL

DILI - Diretor ONG HIR Ozorio Bianco hatete, investor neebe maka durante nee tama mai Timor Leste hodi kuda sira nia modal iha Nasaun ida nee mesak ema kiak no dezempregu, tamba sira mai hadau hotu kampu servisu Timor oan nian iha kualker projetu.

Nia hatete, ema estranjeiru sira barak mak involve servisu iha laran, nunee joven barak mak agora tenke abandona no tenke buka servisu iha Inglatera, Korea inklui faan pulsa, raut rai henek, fase kareta no seluk tan.

Investidor neebe tama mai iha ita nia rai laran, laos ema riku nain neebe mai hodi kuda sira nia modal iha nasaun ida ne, maibe ema kiak no dezempregu sira mak tama hodi hadau kampu servisu joven sira nian, iha kualker projetu laos ema Timor oan mak servisu,” dehan Direitor ONG HIR, Ozorio bainhira dada lia ho STL, iha Perumnas Dili, Dominggu (27/12/2015).

Iha fatin hanesan Xefe Joventude Perumnas Manuel Nunes hatete, ema dezempregu kada tinan sempre aumenta, maibe laiha esforsu husi governu atu bele resolve, oportunidade ba joven sira atu hetan servisu iha nia rai rasik susar, tamba domina ho ema estranjeiru.

Entertantu membru Parlamentu Nasional husi bankada PD, Paulino Monteiro afirma tan katak, ema estranjeiru liu-liu Xineza sira mai lori hotu osan ba rai liur, tamba nee presiza kria lei hodi regula ema estranjeiru neebe mak hakarak mai halo negosiu iha rai laran. Informasaun kompletu iha STL Jornal no STL Web, edisaun Tersa (29/12/2015). Carme Ximenes

Suara Timor Lorosae