PR AMEASA VETA OJE 2016, PM RUI BUKA HATENE RAZAUN

Primeiru Ministru (PM), Rui Maria de Araújo hateten, nia agora dadauk buka atu hatene tuir razaun saida maka Prezidente Repúblika (PR), Taur Matan Ruak, ameasa atu veta Orsamentu Jeral Estadu (OJE) 2016.

PM Rui dehan, Prezidente Repúblika tuir konstituisaun RDTL konsagra ona katak, iha direitu no iha kompetensia maximu atu veta OJE 2016 ne’e.

“Ha’u sei buka hatene diak liu tan razaun tanba saida maka Prezidente Repúblika preokupadu tanba   ida ne’e, molok atu halo komentariu barak liu tan,”afirma PM Rui ba Jornalista iha Akananu Suko Hera, Postu Adminsitrarivu Cristo Rei, Munisipiu Dili, Sesta (04/12).

Antes ne’e, PR Taur Matan Ruak ameasa sei la promulga OJE 2016, kuandu Governu fo nafatin prioridade ba projetu infra-estrutura Zona Espesial Ekonomia Sosial Merkadu (ZEESM) Oe-Cusse no projetu Kosta Sul.

PR Taur dehan, agora dadauk Parlamentu Nasional (PN) halo ona debate ba proposta OJE 2016 ne’ebé ho montante US$1.455 Bilioens ne’e.

“Ha’u apela Parlamentu Nasional para hatun ona osan infra-estrutura agora, tau osan ba saude, be’e mos no saneamentu no agrikultura, tanba ha’u bele la promulga, orsamentu tinan ida ne’e, se sira kontinua hanesan ne’e,”dehan PR Taur Matan Ruak foin lalais ne’e.

Nune’e mos Bankada Parlamentares hat, kompostu hosi CNRT, FRETILIN, PD, FRENTI MUDANÇA, la iha duvidas kuandu PR Taur uza ninia kompetensia konstituisional atu veta OJE 2016.

Xefi Bankada Partidu Demokratiku (PD) Maria Lourdes Besa hateten, mesmu PR Taur la justifika, maibe nia iha kompetensia atu veta OJE 2016 ne’e.

“Ha’u   desde   kedas halo deklarasaun politika bankada PD nian mos demonstra ami nia pre-okupasaun, tanba orsamentu   ba setores   ne’ebe vitais, ita haree povu nia moris hanesan Edukasuan, Saude, Agrikultura , Komersiu Industria no Turismu   nian tun hotu, maibe infra-estrutura sa’e maka’as,” dehan Maria Lourdes.

Nune’e mos, Xefi Bankada CNRT, Natalino dos Santos dehan,   kompetensia deputadu atu aprova osramentu no Governu iha kompetensia hato’o ninia OJE tuir previzaun, kalkulasaun Governu nia kapasidade.

“Se PR haree katak, atu veta OJE 2016 ne’e kompetensia Konstituisional fo ba nia, maibe tenki haree lai no husu tok ba Governu, tanbasa maka Governu tau osan ba infra-estrutura a’as liu”dehan Natalino dos Santos.

Deputadu husi Bankada FRETILIN, Aniceto Guterres Lopes realsa katak, veta ka lae ne’e depende ba Prezidente Republika Taur Matan Ruak, atu ezerse ninia funsaun ne’ebe maka Konstituisaun fo.

“Parlamentu atu mantein ka la mantein orsamentu   ne’ebe mai hosi Governu, ne’ebe desizaun politika, Parlamentu sei la depende ba PR nia ameasa ne’ebe halo, tanba   iha ita nia sistema ne’e iha separasaun de poderes, orgaun soberania ida-idak ezerse ninia funsaun tuir konstituisaun,”dehan Aniceto Guterres.Avi/mia

Jornal Nacional