DOM BASILIO: KADEIA FATIN ATU EDUKA EMA

Amu Bispu Dioseze Baucau nudar mos Administrador Apostóliku Dioseze Dili, Dom Basilio do Nascimento, husu ba prizioneiru sira atu hadia an no muda hahalok ne’ebe ladiak bainhira sai husi kadeia, tanba kadeia hanesan fatin ne’ebe atu hanorin ema sai ema ne’ebé di’ak.

“Maromak ho uma kreda la hadok ema ida, hanesan Katoliku nia ema, tenki tetu saida maka sira halo ona, ne’ebe uma ida ne’e ka kadeia sai mos biban ida atu eduka ema sai ema, laos deit sai fatin kastigu. Uma ida ne’e atu fo biban ba sira nia hahalok atu moris iha sosiedade nia laran, la’os atu haketak tiha sira,”hatete Amu Bispo Basilio liu husi nia homilia bainhira prezide misa ba prizioneiru sira, Sesta (04/12), iha Prizaun Becora, Dili.

Amu Bispu Basilio dehan, bainhira halo misa iha uma ne’e, ema hanoin maluk sira iha fatin ne’e la hatene reja no la hatene maromak, maibe la’e. Uma kreda rasik iha hanoin katak ema ida moris iha fatin ne’ebe deit buat importante mak maromak. Nai maromak nia ilhas hotu, nia la sura hahalok maibe ema maka importante.

“Ita nia hahalok maka dehan ema ne’e diak ou ladiak, ida ne’e maka sai sasukat, uma kreda nia hanoin ema sira ne’ebe iha kadeia importante nafatin,”Dom Basilio hatete tan.

Dom Basilio afirma, kadeia ne’e laos deit iha Timor Leste, maibe iha fatin hotu-hotu iha uma ida ne’e, uma ida ne’e mos uma kreda nia serbisu hotu, uma sira ne’e hotu bainhira ema uza liberdade ladiak, hahalok hasoru lei, hahalok hasoru maun alin sira, entaun uma ne’e sei obriga ema ne’ebe la halo tuir hodi moris iha ne’e. Moris hodi kastigu atu fo hanoin ba maluk ne’ebe la halo tuir lei no viola ema seluk nia vida.

“ Fatin ne’e hanesan atu hadia imi nia moris, ba Maromak atu sala oinsa-oinsa deit maromak nia ema nafatin, importante mak ema, moris hanesan ema no moris hanesan maromak nia oan, Maromak sei la despreza nia ema maske halo sala hasoru nia ukun fuan. Maromak la gosta sala, maibe ema ne’e nafatin nia ilhas katak maromak nia ema. Ne’e duni bainhira sai husi uma ne’e tenki soe hahalok ne’ebe liu ona,”hatete Dom Basilio.

Iha misa refere, Amo Bispo mos fo krisma ba Prizioneiru hamutuk atus ida nen nulu (160), kompostu husi prizioneiru iha prizaun Becora hamutuk 129, prizaun Gleno 28 no guarda prizioneiru nain 3. Husi numeru ne’e ne’ebe iha feto tolu no restu mesak mane.

Iha misa refere partisipa mos husi Sekretariu Estadu Terras no Propriedades, Jaime Xavier Lopez, akompanha mos husi Diretores Minsiteriu Justisa nian. Des

Jornal Nacional