ACBIT Harii Sentru Halibur Vitima Passadu

Asosiasaun Chega Ba Ita (ACBIT) harii sentru hat iha munisipio Viqueque, Covalima, Dili no Bobonaro hodi halibur vitimas asaltu seksual iha tempu passadu iha tinan 2016 ne’e.

Diretora ACBIT, Manuela Leong Pereira, hateten sentru ne’e atu halibur vitima sira hodi dezenvolve sira nia atividades ki’ik  hanesan negosio ba sustentabilidade sira nia familia. 

“Fatin ida ne’e sei halibur sira atu halo atividades hamutuk, enkontru dezenvolve ideas ba atividade negosio ki’ik no bele fo aluga hodi hetan osan,” Diretora ACBIT Pereira hateten, iha salaun Correios, Dili. 

Nia hatutan, sentru ida ne’e sei harii iha area rural, atu fo mos espasu ba feto rural sira dezenvolve atividade ruma ba sira nia moris diak. 

Alende ne’e, nia dehan, ACBIT mos fo kapasitasaun ba vitima sira kona ba jestaun negosio, direitus feto no kona ba lideransa nian. 

Programa sira ne’e finansia husi governu Norwegia (sira nia embaixada iha Jakarta) liu husi organizasaun internasional Hivos ho montante $45,000. 

Tuir dadus ne’ebe iha, hahu tinan 2013 ACBIT konsege identifika ona vitima violasaun seksual iha tempu passadu  hamutuk nain 263 iha munisipio hotu. 

Entretantu reprezentante organizasaun Hivos Timor –Leste, Cinta Dewi, hateten sira orgulho apoiu organizasaun feto sira hodi servisu besik liu ba feto sira ne’ebe moris vulneravel tebes iha area rural. 

“Ami pronto nafatin kolabora ho organizasaun feto sira hodi hakbesik aan no fo suporta ba vitima sira ne’ebe moris vulneravel tebes iha area remotas,” Dewi hateten. 

Iha parte seluk vitima Beatriz Miranda, hateten nudar feto faluk sira nia moris susar tebes tanba hasoru diskriminasaun no estigma oi-oin iha sosiedade. 

“Agradese ba mana bo’ot sira ne’ebe ba supporta no apoia ami iha area rural ne’ebe ema bo’ot sira marginalizada tiha ami, tanba ami ema kiak, at,” nia agradese.

The Dili Weekly