CNRT La Konta PD, PN Sei Hili kompozisaun Prezidente Foun

DILI - Bankada CNRT iha Parlamentu Nasional haruka karta ba Bankada Partidu Demokratiku (PD) hodi hasai PD iha bloku koligasaun parlamentar, tan nee tempu badak Parlamentu sei hili Kompozisaun Meja Parlamentu Nasional foun, hodi troka Vicente Guterres ho nia estrutura.

Tuir Xefi Bankada CNRT Natalino dos Santos katak Bankada CNRT haruka karta ofisial ba Bankada PD hodi fo hatene CNRT la konta ona PD iha bloku koligasaun Parlamentar too Legislasaun remata.

Hau lori bankada nia naran hetan kompetensia husi CPN atu komunika ba aliadu sira katak bloku Parlamentar la eziste ona, hau sei anunsia ba Partidu haat iha Parlamentu hodi informa bloku koligasaun Parlamentar laiha ona,” dehan Natalino ba Jornalista Kuarta (13/04/2016) iha Parlamentu Nasional.

Nia hatete koligasaun iha Parlamentu entre partidu neebe hetan asentu parlamentar hodi forma bloku, CNRT hanesan Maioria haruka ona karta ba PD katak CNRT lakonta ona ho PD iha bloku koligasaun Parlamentar.

Hatan kona ba Kompozisaun Parlamentu Nasional Natalino hatete kompozisaun meja Parlamentu Nasional tempu badak sei hili foun tamba bloku parlamentar laiha ona.

Iha fatin hanesan Prezidente Partidu Demokratiku atual Vice Prezidente Parlamentu Nasional Adriano Nacimento hatete PD nia prinisipiu hakarak kria kultura demokrasia iha Timor Leste, tan nee problema hotu-hotu tenki liu husi dalan dialogu. Informasaun kompletu iha STL Jornal no STL Web, edisaun Kinta (14/4/2015). Timotio Gusmao

Suara Timor Lorosae