Fundu Petrolíferu timoroan tuun dezde tinan ida liubá hafoin hetan tiha valor rekord

Fundu Petrolíferu timoroan, fonte prinsipál hosi reseita públiku sira, to'o ona folin aas tebes iha tinan ida liubá, maibé tuun hahú hosi momentu ne'ebá, tanba folin petroléo brutu no diminuisaun hosi produsaun iha Tasi Timor.

Informasaun hosi Banku Sentral konfirma kata iha fulan-Fevereiru nia rohan Fundu Petrolíferu (FP) rejista ona folin ida besik dolár millaun rihun 16, tuun millaun rihun 1,1 duké iha fulan-Abril tinan liubá, bainhira to'o folin ne'ebé aas tebes.

Informasaun sira halo ho baze iha informasaun hosi Banku Sentral Timor-Leste nian no analiza iha blog "É a economia estúpido", site prinsipal ida hosi análize estatístiku kona-bá makroekonomia timoroan nian.

Gráfiku sira ne'ebé disponivel iha site ne'e hatudu tendénsia hosi FP iha tinan ikus, ho nia folin aas iha fulan-Abril 2015 - dolár millaun rihun 17,1 - no tuun neineik, ba millaun rihun 16, iha fulan-Fevereiru nia rohan.

Tendénsia ba diminuisaun sei mantén iha tinan hirak tuirmai, haktuir hosi previzaun sira hosi ezekutivu timoroan nian, hosi Banku Mundial no hosi FMI, hodi konfirma presaun atu ezekutivu hametin estratéjia ba dezenvolvimentu ekonomia la'ós petrolíferu nian.

Folin hosi FP afetadu tanba diminuisaun hosi folin brutu petróleu nian maibé mós hosi diminuisaun iha produsaun hosi kampu petrolíferu sira ne'ebé iha Tasi Timor.

Produsaun iha fulan ualu dahuluk tinan 2015 maka hamutuk 1/4 hosi tinan 2010 nian, tinan ne'ebé hetan produsaun maka'as liu.

Hanesan ezemplu, posu Kitan iha ona nia moris ikus no estrasaun iha kampu Bayu-Udan sei hahú tuun to'o tinan 2021, bainhira hein atu para total.

Iha mós "performance" ki'ik ida hosi investimentu FP rasik ne'ebé ladún iha rentabilidade duké iha pasadu, akontese tanba bolsa internasional sira ne'ebé laiha estabilidade.

Konfirma hanesan mós diminuisaun iha folin FP hosi informasaun sira kona-bá variasaun anula sira hosi kapital fundu nian ne'ebé tuun hahú hosi 2013 (bainhira rejista variasaun pozitivu aas) no hetan ona folin negativu hanesan iha 2015.

Iha tinan liubá maka folin FP nian tuun ba dala uluk.

Iha 2010, kapital fundu aumenta ona ba dolár millaun 1.527, iha 2011 sa'e ba millaun 2.407, iha 2012 aumenta ona ba millaun 2.464 no iha 2013 aumenta ba dolár millaun 3.211.

Iha 2014, FP ladún aumenta duké tinan anteriór, dolár millaun 1.553, no rejista ona diminuisaun ida hosi dolár millaun 321 iha tinan liubá.

FP hanesan fonte boot hosi reseita públiku sira Timor-Leste nian no selu 90% hosi gasta orsamentál anual sira.

SAPO TL ho Lusa