Prezidente
foun hosi Konsellu Imprensa timoroan nian konsidera, iha loron-segunda ne'e,
katak imprensa hahú hosi independénsia goza períudu ida "viajen kaben
nian" ne'ebé jornalista sira hakerek "saida maka sira hakarak",
nune'e agora tenki hametin nia profisionalizmu no responsabilidade.
Virgílio
da Silva Guterres, eis-jornalista, ko'alia ba Lusa antes simu pose nu'udar
prezidente dahuluk hosi Konsellu Imprensa (CI) foun, órgaun reguladór ida hosi
área komunikasaun sosial iha Timor-Leste.
Bainhira
hatán kona-bá karik imprensa iha Timor-Leste hanesan livre, Guterres afirma ona
katak área hasoru daudaun situasaun ida "viajen kaben nian ne'ebé
jornalista sira bele hakerek saida maka sira hakarak", maski iha kazu
pontuál balun iha pasadu iha interferénsia iha jornalista sira nia serbisu.
"Maski
kazu sira ne'e hanesan parte hosi prosesu aprendizajen nian: hosi jornalista
sira no hosi polítiku sira ne'ebé hahú entende katak ida-idak iha knaar iha
konstrusaun nasaun nian. Problema sira ne'e ajuda harre oinsá maka bele halo
liu limiti sira ka kompeténsia sira", nia hatete.
Objetivu
agora nian maka, ho CI, bele rezolve ho di'ak problema sira ne'e, garanti
profisionalizmu di'ak no aumenta responsabilidade hosi parte jornalista sira
nian.
"Jornalizmu
no liberdade imprensa nian iha nia limiti sira, maski inklui iha direitu
universal sira, ho baze iha orden públiku ka iha sira seluk. Tenki garanti
katak restrisaun sira ne'e halo parte iha lei hodi hatene loloos autoridade
sira ne'ebé maka desidi kona-bá informasaun ka liberdade hetan regulamentu ka
limitadu", nia afirma.
Nia
hatete mós katak hanesan importante atu imprensa timoroan habelar nia atensaun
sira, ultrapasa debate no istória polítiku sira hodi fó fatin ba tema nasional
sira seluk no "liuliu fó lian ba ema ne'ebé laiha lian".
"Sai
jornalista la'ós la'o loron-loron tuir ministru ka polítiku sira. Fó mós
oportunidade ba ema ne'ebé laiha lian. Maibé jornal sira, rádiu ka televizaun
hatudu de'it ministru sira", nia afirma.
"Imprensa
labele iha de'it limiti hodi hakerek saida maka polítiku sira ko'alia. Ha'u
hein katak ho CI bele tulun hodi muda", nia hatutan mós.
Aspetu
ida ne'ebé nia kontesta liu hosi mandatu órgaun ne'e nia maka sai fiskalizadora
no to'o fó kastigu ba jornalista sira no mós ba órgaun sira komunikasaun sosial
nian (OCS).
Knaar
ida hosi "polísia jornalista sira nian" ne'ebé nia rekoñese bainhira
le "kompeténsia sira hosi CI", maka aspetu sira ne'ebé nia la
konkorda durante debate lejislasaun nian.
"Ha'u
lakohi atu CI sai de'it hanesan tribunal ki'ik ida ba jornalista sira. Ami
tenki iha knaar mediador ida no tulun hodi evita kastigu sira disiplina maka'as
nian", nia konsidera.
Iha
fulan neen dahuluk, membru sira hosi CI sei aprova kódigu profisionál hosi
jornalista sira nian no hafoin ne'e regulamentu internu sira hosi funsionamentu
konsellu rasik, nune'e "fasilita mós rejistu hosi órgaun sira no entidade
sira hosi komunikasaun sosial, ho estatutu editorial ba sira ida-idak".
"Hafoin
ne'e maka ami bele hahú kumpri ami nia mandatu fiskalizasaun no análize hosi
konteúdu jornalístiku sira nian", nia esplika.
Kona-bá
atribuisaun karteira profisional, Virgílio Guterres hatete ona katak iha
obrigasaun ba períudu estájiu serbisu nian "sei kontribui maka'as hodi
aumenta profisionalizmu hosi imprensa iha Timor-Leste".
"Área
ida ne'ebé iha pasadu hetan beibeik krítika, liuliu tanba kualidade hosi
jornalizmu", nia afirma.
Aleinde
Virgílio Guterres - nomeadu hosi Parlamentu Nasional - CI komposta mós hosi
jurista Paulo Adriano da Cruz (nomeadu mós hosi parlamentu), Francisco Belo ho
Hugo Fernandes (nomeadu hosi jornalista sira) no José Ximenes (nomeadu hosi
OCS).
Tomada
pose sei akontese iha serimónia ida iha Parlamentu Nasional timoroan nian iha
loron-tersa dadeer, oras lokal.
SAPO
TL ho Lusa
Sem comentários:
Enviar um comentário