LORON MUNDIAL BA IMPRENSA, KNAAR JORNALISMU IMPORTANTE BA KONSTRUKSAUN ESTADU

Liu husi komemorasaun loron mundial ba imprensa ne’ebe monu iha  loron 3 Maiu 2016 horseik, Organizasaun Jornalista sira iha Timor Leste konsidera katak, knaar jornalismu importante tebes ba konstruksaun Estadu.

Nune’e iha komemorasaun ba loron ne’e mos, Timor-Leste Press Union (TLPU) ejije ba nain media sira hotu atu trata jornalistas sira ho dignu, tamba knaar jornalismu ne’e atu kontribui mos ba nasaun no Estadu nia diak iha aspetu hotu.

Iha oportunidade ne’e TLPU mos husu ba Estadu TL liu-liu Governu atu trata jornalista ninia vida ho dignu, liu-liu kria lei ruma hodi regulariza salariu minimu, tanba labele konsidera jornalista ne’e hanesan traballador bai-bain ida, tanba ho kondisaun ida hanesan ne’e maka durante ne’e kontribui ba inkapasidade no profesionalizmu jornalista ninian.

“Tanba durante ne’e ami observa katak iha prosesu defende liberdade imprensa jornalista TL ninian kondisaun sei mukit, em termus de bem estar hodi fo konsekuensia ba kualidade kontrolu sosial, nune’e nain ba media sira tenki trata jornalista ho dignu em termus de finansial no kapasitasaun atu eleva kapasidade jornalista halao funsaun jornalista tuir direitu no dever jornalista ninian, ne’ebe maka haktuir iha lei komunikasaun sosial konaba dever iha artigu 19, 20 no kodiku etika jornalista nian ne’ebe maka haktuir ona iha artigu 21,” Sekretariu Jeral TLPU, Manuel Pinto deklara asuntu refere liu husi konferensia ba imprensa ne’ebe realiza iha Peace Coffee-Dili, Tersa hodi komemora loron mundial imprensa ne’e.

Iha oportunidade ne’e TLPU husu mos ba ukun nain sira atu labele konsidera jornalista hanesan inimigu, maibe tenki konsidera jornalista ne’e hanesan parseiru ida.

“Ho haraik a’an ami organizasaun TLPU husu ba publiku liu-liu ukun nain sira atu labele konsidera jornalista nu’udar inimigu, maibe konsidera netik ami hanesan parseiru ida atu hametin demokrasia, nune’e karik iha sasidik ruma entre publiku ho jornalista tribunal laos solusaun, maibe tenki konsidera saida maka haktuir ona iha lei komunikasaun sosial katak Konsellu Imprensa (KI) sai fatin nudar mediasaun hodi buka solusaun antes ita hakat ba tribunal,”haklaken sekjer TLPU.

Manuel Pinto hatutan, TLPU observa iha TL garante ona liberdade imprensa no meus komunikasaun sosial, iha liberdade editorial, protesaun independensia, maibe seidauk rigor iha prosesu goza liberdade imprensa, tanba kestaun profesionalizmu no rekursu umanu maka sai nudar bareira ne’ebe maka jornalista tenki ultra pasa.

“Ami organizasaun TLPU husu ba Estadu TL tenki tau iha pratika knar Estadu ninian ba area komunikasaun sosial ne’ebe maka haktuir ona iha lei komunikasaun sosial espesialmente iha artigu 5, e tuir konstituisaun Republica Democratica de Timor Leste (RDTL) iha artigu 1 mos hateten, TL nudar Estadu direitu no demokratiku ne’ebe garante liberdade imprensa, no iha artigu 40 no 41 haktuir mos katak iha obrigasaun moral ida atu konsidera loron 3 Maiu hanesan loron importante ida tanba ita  nia rai mos ezisti liberdade imprensa,”tenik nia.

Entretantu Prezidente TLPU, Francisco Simões Belo hateten, liu husi konferensia imprensa ba komemorasaun liberdade imprensa ne’e TLPU kongratula no agradese jornalista TL tomak, ba erois sira ne’ebe fo ona vida ba independensia TL ninian, e apresia mos Estadu tanba garante ona liberdade imprensa iha TL.

“Kongratula ba jornalista sira iha TL, la haluha hato’o ami nia agradese bo’ot ba erois nasional sira  ne’ebe fo ona sira  nia  vida hodi nakfilak tiha rai ida ne’e sai ona nasaun,  no ami hato’o mos ami nia apresiasaun bo’ot no agradesimentu bo’ot ba fundador sira Estadu  no nasaun  ida ne’e, ne’ebe garante ona liberdade  imprensa hodi konsagra iha konstituisaun RDTL artigu 40-41,”afirma Francisco Simões Belo.

Estudante kari aifunan iha monumentu Sander Robert

Entretantu iha fatin la hanesan estudante Universidade Nasional Timor Lorosa’e (UNTL)husi departamentu Komunikasaun Sosial (KS) realiza marsa hahu husi kampus fakuldade Siensia Sosiais Caicoli to’o igreza Becora hodi tau aifunan ba monumentu martir jornalista Alemaña ne’ebe maka mate iha tempu rezistensia nian.

“Lolos ne’e atividade atu komemora loron liberdade imprensa mundial ne’e tinan-tinan UNTL liu husi departamentu Komunikasaun Sosial (KS) sempre halao, e ami iha area akademika sempre halo seminariu loron ida e depois halo marsa atu atu tau aifunan iha monumentu martir jornalista koñesidu ho naran Sander Robert Stones iha igreza Becora nia oin, ne’ebe maka mate iha tempu rezistensia ninian,”Vise departamentu KS-UNTL, Dominika Dwikori Sitaresmi.

Nia dehan,  atividade ne’ebe refere importante, tanba departamentu KS ne’e prepara estudante atu reforma sira sai jornalista no ema ne’ebe maka sei servisu iha media ho kualidade ne’ebe diak, nune’e loron ida ne’e sai loron ida ne’ebe espesial tebe-tebes mai estudante KS.

“Konaba kuantidade estudante ne’ebe maka sei partisipa iha marsa ne’e hau ladun hatene, maibe ba partisipasaun estudante iha seminariu komemorasaun loron liberdade imprensa ne’ebe maka realiza iha loron 2 Maiu ne’e kuaje partisipantes 250, nune’e parese total ida ne’e maka partisipa iha marsa refere,”dehan Dominika.

Realiza marsa no kari aifunan ne’e nia dehan, tanba iha nasaun balun jornalista barak maka sempre mate ba sira nia knaar, ho nune’e maka departamentu KS sei esforsu makaas atu luta kontra buat hirak ne’e, tanba kuandu jornalista ruma hakerek sala parte ne’ebe maka sai tarjetu ba notisia ne’e karik la satisfas tenki responde ho hakerek la’os buat hotu-hotu hakarak rezlve liu husi iha tribunal deit.

Entretantu tuir lider ekipa marsa estudante KS, Martinho Moniz hateten, atividade marsa no kari aifunan ida ne’e hanesan kontinuasaun programa seminariu liberdade imprensa iha loron 2 Maiu, nune’e marsa ida ne’e KS realiza hodi komemora loron mundial ba liberdade imprensa ninian.

“Nune’e agora (03/05) ita sei hala’o marsa ne’e hahu husi fakuldade Siensia Sosiais UNTL to’o ba monumentu Sander Robert Stones iha igreza Becora nia oin, tanba nia hanesan jornalista Alemaña ida ne’ebe maka mate iha momentu luta ba independensia TL ninian, nune’e marsa ida ne’e hanesan asaun solidariedade no sentimentu kondolensia ba jornalista sira ne’ebe maka mate ona,”Martinho dehan.

Nune’e mos, iha loron liberdade imprensa ne’e, Assosiasaun Jornalista Timor-Leste hala’o konferensia internasional atu koalia kona ba lalaok, progresu no dezafiu media nian iha mundu agora iha Hotel  JL  Vila  Fatuhada, Dili.

Tenke hadia kualidade notisia

Nune’e mos, Sekretariu  Estadu  Komunikasaun  Sosial  Nelio  Isaac  Sarmento husu media hadia kualidade  notisia.

“Estadu no Governu foti as tebes liberdade  imprensa, maibé  ami ejize mos kualidade  ho  responsabilidade,”hatete  Sekretariu  Estadu  Komunikasaun  Sosial  Nelio  Isaac  Sarmento bainhira loke seminariu ne’ebe organiza husi Asosiasaun Jornalista Timor Leste (AJTL) ho tema Freedom of the Press and The Challenging Journalistic of Timor Leste iha  salaun  Hotel  JL  Vila  Fatuhada,  Tersa  (3/5/16).

Nia  dehan, Estadu  ho  povu  ida  ne’e  moris  husi  konflitu  nune’e  presiza  atu  dinamika  oituan  ninia  pensamentu  katak, oinsa  nasaun  ne’e  bele  dura  no  naruk  ho  hanoin  ne’ebé  mak  bele  garante  demokrasia  liu  husi  servisu  liberdade  imprensa  ninia.

Tuir nia, media  sira  sai  faz  parte  husi  kontrolu  sosial  ninia  hodi  fó  ezemplu  diak  ba  komunidade  sira  nune’e  jornalista  sira  iha  obrigasaun  duni  atu  ejizi  ba  politika  nain  sira  atu  la’o  tuir  dalan. maibe jornalista tenki  respeita  dignidade sidadaun nian.

Nia haktuir, ema  hotu  uluk  hanoin  jornalista  ne’e  fatin  ida  ne’ebé  fasil  liu  atu  hetan  servisu, maibé  wanhira  hala’o , la  kualker  ema  atu  sai  jornalista hodi sai edukador  ba publiku.

Iha parte seluk, Presidente Konsellu Imprensa Virgilio da Silva Guterres dehan, KI sei garante liberdade espresaun liu-liu liberdade publika informasaun ne’ebe los.

Tantu membru International Federation for Jornalisme (IFJ) Jim Nolan sekunda, iha nasaun balun hanesan Thailandia ho Malaysia seidauk iha liberdade lolos.

Maibe iha Indonesia, Konsellu Imprensa hakas an garante liberdade espresaun no imprensa iha sira nia sosiadade.

Seminariu internasional ne’ebe realiza husi AJTL ne’e hodi komemora loron mundial liberdade imprensa.

Iha seminariu ne’e partisipa husi membru IFJ Jim Nalon, presidente KI Virgilio Guterres, membru SEAPA Wisnu T.Hanggoro no prezidente AJTL David Hugo, inkliu membru AJTL.

KI sei defende salariu jornalista

Prezidente konsellu Inprensa (KI) Virgilio Guterres afirma, KI sei koalia ho media nain konaba salariu ba jornalista.

“Ami sei koalia ho media nain atu hare salariu jornalista. Basa jornalista esforsu an hakerek nutisia ho kualidade, media nain mos tenki fo kompensasaun ne’ebe diak, tuir sira nia profesionalidade,”dehan Virgilio Guterres ba JN-Diario iha Hotel JL-Vila, Tersa (3/5/16).

Virgilio hatutan, tuir lei komunikasaun sosial sei iha  kriteria balun ne’ebe media sira tenke aplika molok atu rekruta  jornalista, hanesan rekruta tenke liu husi estajiu, aleinde estajiu liu tiha maka bele hetan kontratu servisu hanesan profesional. Se jornalista servisu profesional nia kompensasaun tenke selu tuir nia profesional.

Entretantu, kompara ho servisu Governu ne’ebe servisu ho profesional, dala barak akontese media nain ladun fo kompesensaun ne’ebe justu ba jornalista, entaun KI nia komitmentu oinsa atu koalia ho media nain sira bele haree kestaun ida ne’e.

Iha parte seluk, Sekretariu  Estadu  Komunikasaun  Sosial  Nelio  Isaac  Sarmento husu  ba  Konsellu  Imprensa  atu servisu  maka’as  hodi  fortifika  instituisaun ne’e hodi hetankonfiansa povu.

“Tenki  hahú  kedas  garante  fiar  atu  nune’e  ema  hotu  bele , tanba laos  hare  deit  ba  kualidade  informasaun  jornalista  nian, maibé  KI  mós  tenki  servisu  atu  fortifika  instituisaun  KI  ne’e  hodi  povu  bele  fiar  atu  lori  prosesu  jornalista  sira  nian  ba  iha  organizasaun,” dehan Sekretariu Estadu.

Nia dehan, iha  lei  komunikasaun  sosial  hateten, iha  buat  balun  bele  lori  ba  konsellu, no  mós  balun  ema  sente  katak, la  fiar  KI  no  hakarak  lori  kazu  ne’e  ba  tribunál  ne’e  lei  fó  dalan, tamba  ita  la  hatene  limita  ema  direitu  atu  asesu  ba  justisa, nune’e  ita  hotu  bele  hare  hodi  hadia.

Ho ida ne’e, Virgílio Guterres garante katak, hahú  nia  servisu  sei  buka  kordena  no  hetan  fiar  husi  media  nain  no  asosiasaun  media  sira  hodi  buka  dalan  hamutuk  ida  ne’ebé  diak  liu  atu  bele  garante  liberdade  ne’ebé  iha  liu-liu  liberdade  publiku  atu  hetan  informasaun  ne’ebé  los.

Nia mos husu ba  jornalista atu kontinua le’e  no  estuda  didiak  lei  komunikasaun  sosial, no  kódigu  étika  ba  jornalista  hodi  intrepeta  lolos, tamba  ne’e  sai  hanesan  material  ne’ebé  loro-loron  lori  tun  sa’e.

Governu kontinua garante direitu fundamental

Alen de ne’e, Primeiru Ministru (PM) Rui Maria de Araújo, Governu iha kompromisu  nafatin servisu hodi nafatin garante  direitu fundamental jornalista nian.

PM Rui hato’o lia hirak ne’e ba jornalista sira wainhira selebra loron mundial  imprensa Tersa (03/05) hamutuk ho jornalista  nasional no Internasional sira iha Palasiu Governu.

“Loron liberdade imprensa ninian hanesan  ita bo’ot sira hatene, mundu tomak selebra loron ida ne’e, tanba rezolusaun Nasoins Unidas nian ne’ebe maka hamosu  kona-ba liverdade imprensa, hodi Governu nia naran hakarak hato ba ita bo’ot sira kompremisiu Governu ninian atu nafatin servisu hodi nafatin garante direitu fundamental ida ne’e,”esplika PM Rui.

PM Rui hatutan, Timor Leste liu husi Konstituisaun,  iha  artigu 40 no artigu 41 koalia ona kona-ba direitu fundamentais sira ne’e, depois aprova tiha ona kode etika jornalista,  aprova tiha mos lei komunikasaun sosial.

Nune’e mos, PM Rui dehan, Konselhu Imprensa (KI) semana oin simu pose, tanba ne’e, mekanismu instituisionais lubuk ida ne’ebe Estadu liu husi  Govenu estabelese ona nafatin apoia direitu fundamental ida ne’e ba sidadaun hotu.

Iha loron liberdade imprensa ne’e, Governu dala ida tan reinteira  kompromisu atu nafatin servisu  para  garante liberdade esperasaun, liberdade imprensa, klaru nafatin   iha koridor ne’ebe lei defini tiha ona.

 “Ida ne’e maka  mensajen ba ita boot sira hotu, aproveita  mos lansa  korpu jornalista ne’ebe maka servisu ba Palasiu Governu, simbolikamente  intrega karta ne’e ba  ita bo’ot sira  para depois asesu iha Palasiu hodi nune’e  hetan kompromisu ida ne’ebe  Governu hato’o ba  ita bo’ot sira hetan asesu ba  informasaun bele rekolha  hodi nune’e bele desimina ba publiku,”tenik PM Rui.

Jornalista  ne’ebe maka simu kartaun asesu ba Palasiu Governu ne’e mai husi media imprensa nomos elektroniku sira ne’ebe ezisti iha Timor-Leste.ves/eti/tos/ avi

Jornal Nacional