Wikileaks akuza Prezidente interinu hanesan informante Estadus Unidus nian

Wikileaks, organizasaun lahó final lukrativu sueku, hakerek ona iha rede sosial Twitter katak prezidente interinu brazileiru, Michel Temer, hanesan "informante hosi embaixada Estadus Unidus nian".

Tuir dokumentu sira ne'ebé fó sai, visi-prezidente, ne'ebé kaer ona Prezidénsia interinu, hodi Dilma Rousseff ba julgamentu iha Senadu iha sekuénsia hosi aprovasaun ba pedidu destituisaun nian, halo korespondénsia ho embaixada no konteúdu klasifika ona hanesan sensível no "uza de'it ba asuntu ofisial".

Tuir dokumentu sira, hosi fulan-Janeiru no fulan-Juñu 2006, Michel Temer hato'o nia hanoin kona-bá situasaun polítika iha tempu ne'ebá, iha konkretu maka hanoin sira kona-bá eleisaun sira tinan 2006, bainhira Lula da Silva sai eleitu fali.

Dokumentu sira hatudu katak Michel Temer karik analiza diferensa sira entre eis-prezidente Lula da Silva ho Fernando Henrique Cardoso.

"Klase sira C, D ho E fiar katak Fernando Henrique naok ona ema kiak sira no fó ba ema riku sira. Lula naok ema riku sira hodi fó ba ema kiak sira", hakerek iha fraze ida ne'ebé atribui hosi xefe Estadu ne'e.

Telegrama sira hatudu mós oinsá Michel Temer nega katak nia kalkula oinsá maka lalaok hosi dalan eleitoral nian maibé nia afirma ona katak sei iha volta daruak.

Iha okaziaun, nia afirma mós katak nia movimentu partidáriu, Partidu Movimentu Demokrátiku Brazileiru (PMDB), sei la sai aliadu ba Partidu Traballadór sira (PT, hosi Lula da Silva) no mós la sai aliadu hosi Partidu Sosial Demokrasia Brazileiru (PSDB), pelumenus to'o turnu daruak.

Michel Temer karik hatete mós katak nia partidu sei hili iha tinan ne'ebá governadór entre na'in 10 no 15 no sei iha bankada maioria sira iha Senadu no iha Kámara hosi Deputadu sira nian.

"Sé maka hakarak mana'an eleisaun prezidensiál tenki mai ami hodi halo buat ruma", nia hatete no haktuir hosi Wikileaks.

SAPO TL ho Lusa