Brazil lansa primeiru teste vírus Zika ne’ebé fó rezultadu iha minutu 20

Sekretaria Saúde Bahia nian aprezenta ohin, iha Salvador, primeiru teste sorolójiku lais iha Brazil hodi detekta vírus Zika, ne’ebé fó rezultadu iha minutu 20.

Aprezentasaun ne’e halo hafoin teste pioneiru, ne’ebé substitui prosedimentu ne’ebé bele lori semana, hetan aprovasaun hosi Ajénsia Nasionál Vijilánsia Sanitária (Anvisa).

Sekretáriu Saúde Bahia nian, Fábio Villas-Boas, sita hosi Ajénsia Brazil, esplika katak uluk Zika bele diagnostikadu, iha laboratóriu liuhosi PRC [métodu ne’ebé deteta prezensa karga jenétika virus ne’e nian], ne’ebé demora no karun tebes.

Hahú agora, nia subliña, sei bele "oferese diagnóstiku iha kualkér postu saúde iha fatin sira ne’ebé dook liu iha nasaun, no iha de’it minutu 20 populasaun bele hetan ona resposta karik iha ka hetan Zika".

"Ohin loron eziste kuantidade ema ho sintoma ne’ebé laiha diagnóstiku definitivu (...) Hahú agora, liu-liu ba feto sira iha idade jestasionál, iha informasaun karik nia hetan ka seidauk hetan Zika ne’e relevante tebes ba nia desizaun, hodi inisia jestasaun", hatete.

Teste sorolójiku lais la identifika vírus ne’e rasik, maibé prezensa hosi nia antikorpu, permite diagnóstiku iha kualkér faze hosi moras.

Prosedimentu ne’e dezenvolve hosi BahiaFarma, fundasaun ne’ebé iha ligasaun ho sekretaria Saúde Bahia nian,no hosi empreza koreana ida, iha fulan sanulu ikus ne’e.

Ho autorizasaun ne’ebé Anvisa fó, agora laboratóriu hein pedidu hosi Ministériu Saúde hodi inisia fabriku no distribuisaun teste iha nasaun tomak.

Brazil, nasaun ne’ebé afeta liu hosi atuál epidemia Zika, rejista ona kazu millaun ho balun resin no bebé 1.400 resin moris ho mikrosefalia ka alterasaun sira seluk iha sistema nervozu ne’ebé iha ligasaun ho virus ne’e.

SAPO TL ho Lusa