Esforsu Timor-Leste nian prémiadu iha Loron Mundiál Sein Tabaku

Loron Mundiál sein Tabaku komemora iha loron 31 Maiu. Organizasaun Mundiál Saúde promove loron ne’e hodi subliña efeitu negativu ba saúde ne’ebé kauza hosi uzu tabaku no hodi fó prémiu ba indivídu no organizasaun sira ne’ebé destaka esforsu ne’ebé halo hodi kontribui ba hamenus konsumu tabaku.

VI Governu Konstitusionál foti medida signifikativa hodi redús uzu tabaku, lansa kampaña ida iha televizaun no iha rádiu hodi aviza kona-ba perigu hosi konsumu tabaku no insentiva fumadór sira atu husik ábitu ne’e.

Iha pesoál médiku formadu hodi ajuda ema atu para fuma tabaku. Iha parte seluk, lejislasaun prevee restrisaun publisidade ba tabaku, konsumu iha fatin públiku no faan produtu ho baze tabaku ba idade ki’ik sira.

Hodi rekoñese medida promosaun Timor-Leste saudável, Organizasaun Mundiál Saúde (OMS)fó prémiu tinan ne’e, iha rejiaun Sudeste Aziátiku, ba Primeiru-Ministru timoroan, Rui Maria de Araújo.

Reprezentante OMS nian iha Timor-Leste, Dra. Rajesh Pandav, konsidera lideransa Xefe Ezekutivu kona-ba kestaun ne’e hanesan "ezemplu ida ba nasaun sira seluk ne’ebé iha hela dezenvolvimentu". Primeiru-Ministru nomeadu ba prémio ne’e hosi Health Alliance International.

Portavós VI Governu Konstitusionál nian, Ministru Estadu Agio Pereira, reforsa ideia ne’e katak "konsekuénsia hosi konsumu tabaku aas iha saúde, iha Timor-Leste, labele ignora. Ba ita-nia dezenvolvimentu no atu ita kria futuru saudável ba joven sira ita-nia nasaun nian, hanesan esensiál medida hodi limita konsumu tabaku. 

Hanesan Primeiru-ministru refere iha nia mensajen televiziva ohin nian, ema tenke para konsumu tabaku, tanba preokupa ho nia saúde rasik no saúde Nasaun nian".

SAPO TL ho Portál Governu Timor-Leste nian