MANTEIN VETERANUS LIDERA F-FDTL, GOVERNU HALO REVIZAUN LEI MILITAR

Governu halo revizaun ba lei militar ninian, ho objetivu atu mantein nafatin veteranu sira lidera nafatin instituisaun Falintil Forsa Defeza Timor Leste (F-FDTL).

Ministru defeza, Cirilo Cristovão informa katak, iha sorumtu ho Prezidenti Repúblika (PR), Taur Matan Ruak ne’e, ko’alia mós kona-ba dezenvolvimentu estratéjiku forsa nian, ne’ebé mak esbosu lei ne’e agora dada’uk iha ona Prezidenti Repúblika.

“Lei estatutu militar nian, artigu ida ma kami halo revizaun, li-liu ba mandate Xefe Estadu Maior nian. iha ne’eba hatete katak, mandatu Xefe Estadu Maior nian ne’e, tinan rua-rua,” informa Cirilo Cristovão ba jornalista sira iha Palacio Prezidensia Aitarak Laran Dili, Kinta (16/06).

Maibé Cirilo esplika, ho sirkumstansia ne’e, instituisaun F-FDTL sei presiza hela lider veteranu sira iha forsa laran, atu asegura tranzisaun progresiva ida ba jerasaun foun sira.

“Tanba ne’e mak ita altera tiha lei ne’e, aumenta tan tinan rua ba mandatu tolu ne’ebé mak Konsellu Ministrus aprova tiha ona, i hein lori mai Prezidenti Repúblika promulga,” afirma Cirilo.

Tanba ne’e, Cirilo dehan, iha sorumutu ho PR Taur Matan Ruak ne’e, sira ko’alia kona-ba lei ida ne’e.

“Prezidenti Repúblika mós konkorda ona, iha konsertasaun entre Governu ho Prezidenti Repúblika, i Prezidenti sei promulga para depois Koronel Falur bele kontinua nafatin iha postu Xefi Estadu Maior,” esklarese Cirilio.cos

Jornal Nacional