Guiné-Bissau ratifika akordu koperasaun oioin ho Guiné Ekuatorial

Primeiru-ministru Guiné-Bissau nian, Baciro Djá, fó sai ona katak ratifika tiha ona "akordu koperasaun oioin" ho Guiné Ekuatorial, nasaun ne'ebé nia hala'o ona vizita serbisu durante semana ida.

Bainhira nia to'o iha aeroportu Bissau, iha loron-sesta ne'e, Baciro Djá afirma ona katak harii ona posibilidade ba akordu sira rubrikadu sira iha pasadu ho Guiné Ekuatorial sei hahú hala'o iha tempu sira tuirmai.

Akordu ratifikadu sira sei permiti koperasaun entre Bissau ho Malabo iha área ekonómiku, sientífiku, kultural, desportivu no tékniku, hatete hosi dirijente guiniense.

Iha termu konkretu sira, Guiné-Bissau sei hetan apoiu hosi Guiné Ekuatorial ba formasaun, iha tempu badak, hosi ajente seguransa no protesaun hosi autoridade sira hamutuk na'in 50, nune'e mós iha domíniu hidrokarbonetu sira, liuliu iha petróleu ho gás.

Bissau hakarak "hetan esperiénsia" hosi Guiné Ekuatorial liuliu iha área elaborasaun hosi kontratu sira, formasaun no hosi koñesimentu tékniku iha área sira petróleu no gás nian, hatete hosi Baciro Djá, ne'ebé hatete katak hanesan "provável atu Guiné-Bissau iha rekursu rua ne'e".

Iha ona fulan-Agostu, ministru Petróleu no Mina sira hosi Guiné Ekuatorial vizita Bissau no, iha Setembru, tanba okaziaun hosi festa sira independénsia Guiné-Bissau nian, Prezidente Teodoro Obiang Nguema mós sei marka prezensa iha kapital guiniense, hatete hosi primeiru-ministru.

Governu Malabo mós hakarak apoia selesaun futeból Guiné-Bissau nian ba estájiu ida ne'ebé sei halo antes kampeonatu afrikanu ba modalidade nian ne'ebé sei hala'o, iha viziñu Gabaun, iha fulan-Janeiru 2017, hatete hosi primeiru-ministru guiniense.

Hosi Guiné Ekuatorial, Baciro Djá hala'o ona viajen ba Nijéria, ne'ebé asina mós akordu koperasaun oioin no hatete katak hetan ona promesa apoiu nian ba Orsamentu Jeral Estadu nian.

SAPO TL ho Lusa