Ha’u Maka Inan, Ha’u Maka Aman

Laloran tasi tahek an, tahek inan doben Esperansa Hornai hosi nia laen kaben Francisco Alves Barretoiha 2016 ne’e, hodi husik hela responsabilidade hotu ba nia laen nia kaba’as.

Francisco Alves Barreto, aman hosi oan nai’n lima (5), feto ha’at (4) no mane ida (1), hasan hela triste bo’ot tanba lakon ona nia feen kaben iha Sabado (7/05/2016) ne’e maibé responsabilidade ba oan sira nian futuru nafatin hatodan no hafanu nia.

Responsabilidade nu’udar aman ne’ebé mak la iha serbisu diak ida ba nia atu halo hodi hetan netik duit metan ruma, ho esforsu an, Francisco nafatin luta hili dalan hatutan nia serbisu hanesan faan sasan iha estrada ninin.

Francisco Alves Barreto hahu faan sasan roda tolu iha estrada ninin hahú iha 2001 maibé estadu sira bandu no hadau sira nia sasan, gerobak soe hotu iha Tasi-Tolu no halo sira tauk ohin loron sira la faan iha estrada laran entaun nia hili dalan faan sasan iha Banku Nasional (BNU), nia portaun oin.

Nu’udar aman Francisco tane a’as tebes oan sira nia futuru, nia hakarak nia oan sira sai susesu, halo nia tuur iha BNU nia oin la senti rai manas, udan no kole.

“Ha’u faan hanesan ne’e tanba ha’u nia oan sira eskola no nia inan mate tiha ona, ne’e mak ha’u senti la diak entaun ha’u mai fa’an sasan iha ne’e para lori sustenta oan sira ba futuru,” dehan Francisco ne’ebé Moris iha Suku Fatumakerek, Laclubar, Munisípiu Manatuto ne’e ho mataben nakonu.

Kareta, motor halo movimentu ba mai halo rai rahun suar sai belun diak ba Francisco. Tuur iha portaun BNU nia oin nahe plastiku metan hodi rai karteira ho modelu oi-oin, sigaru no pulsa iha liman no xapeo iha ulun mak sai netik mahon ba nia.

“Ami mai faan ne’e iha 2001 kedas tanba ita hela iha sidade ne’e tenki han osan, hemu osan. Maibé, ami fa’an netik hanesan ne’e ami lori sustenta ami nia familia no haruka oan sira ba eskola,” nia haklaken ho oin midar ba Jornalista Matadalan, Tersa (19/07/16), iha BNU nia oin.

Loron maske manas, udan no rai rahur maka’as Francisco nafatin tuur hodi haree ba movimentu ema lubun loron ba loron tama sai BNU hanesan  nehek mean forma-án nadodon tama ba banku nia laran hodi hetan doit metan oan ruma.

“Ha’u uluk fa’an roda tolu, sasan sira hanesan bee, minuman sira hanesan bigcola, gres no sasan ki’ik seluk tan ne’e loron ida ha’u hetan $60,00. Maibé agora ha’u fa’an de’it hanesan ne’e loron ida sorte diak ha’u hetan $30,00 lae $40,00 mais sorte la diak, loron ida ha’u hetan $15,00 de’it,” dehan Francisco ne’ebé ho idade 54 ne’e.

Hisik kosar tanba no la senti kole tanba hakarak oan sira sai diak, osan ne’ebé loron ida nia hetan lori ba hola fo’os bah an no foo an sira ba eskola.

“Buat ida la iha entaun ami tenki halo hanesan ne’e ba moris lor-loron nian. Uluk roda tolu ha’u sei kontenti maibé estadu la hanoin ami. Sira mai foti gerobak, sasan sira ne’e lori ba soe ne’e maka ohin loron ami la faan iha estrada ibun no agora ami lori de’it sasan sira hanesan ne’e,” dehan nia.

Moris sempre infrenta dezafiu oi-oin maibé Francisco Alves nia esforsu sei la iha rohan maske ho de’it faan sasan simples maibé nia nafatin luta ba nia oan sira nia futuru. (Júlia)

Matadalan