DILI
(ANTIL) – Konsellu Imprensa (KI) lamenta ho atitude membru Polísia Nasionál
Timor-Leste (PNTL) ne’ebé impede jornalista atu hala’o nia knaar, Prezidente KI
Interinu, Jose M Ximenes hateten.
Ko’alia
ba Konferénsia imprensa, Sesta (05/08) iha edifísiu Konsellu Imprensa, Eis CNE,
Balide, Dili, Prezidente Interinu KI, José Maria Ximenes, konsidera
agresaun fizíku ne’e aktu violentu hosi ajente Estadu nian.
Tuir
Ximenes, jornalista iha direitu atu hetan asesu ba eventu hotu-hotu iha fatin
ne’ebé nakloke ba públiku. “ Agresaun fizíka hasoru jornalista no hadau
ekipamentu kobertura ne’ebé jornalista sira iha ne kontra Lei komunikasaun
Sosiál, “José Ximenes dehan.
Konsellu
imprensa hato’o ba entidade hotu-hotu, liu-liu instituisaun Estadu no Governu
atu fó ezemplu di’ak no garante liberdade imprensa no espresaun iha
Timor-Leste.
Iha
fatin hanesan, Komisáriu Paulo Araújo hateten, kazu ne’e iha ona ministériu
públiku. Konsellu Imprensa akompaña hela nia progresu. “ Konsellu imprensa fó
fiar tomak ba autoridade kompetente atu bele hala’o nia knar,” Paulo dehan.
“Ami
buka meius atu halo mediasaun nafatin. Prosesu ne’ebé tama iha judisiáriu,
tenki hala’o no loke ba públiku. Ba prosesu dialogu, bele liu husi mediasaun
iha Konsellu Imprensa,” nia dehan tan.
Diretora
Ezekutiva KI, Ana Sequeira hateten, Konsellu Imprensa sei halo sosializasaun
Lei Komunikasaun Sosiál ba públiku atu hatene kona-ba profisaun jornalista. “
Ami sei halo duni servisu sinsibiliza Lei ne’e ba instituisaun sira, inklui
PNTL,” Ana dehan. (Jornalista Zezito da Silva/editora: Lidia Neves)
Sem comentários:
Enviar um comentário