DILI,
(ANTIL) – Universidade Nasionál Timor Lorosa’e (UNTL), sei koopera ho City
University of Macau ba área mobilidade akadémiku entre universidade.
“Mobilidade
ne’e mak entre estudantes, hanorin na’in sira, tékniku administrativu sira,
peskizadór sira nomós halo partisipasaun iha konferénsia internasionál, peskiza
no publikasaun sientífika konjunta”, Reitór UNTL, Francisco Miguel Martins ba
ANTIL iha Kampus Sentrál UNTL, Tersa, (27/9).
Natureza
universidade nian, liuhusi asinatura MoU (Memorandum of Understanding) ne’e sei
koopera iha área turizmu, edukasaun, arte no kultura no área seluk ne’ebé
dezenvolvidu iha Macau inklui mós aprezentasaun sientífiku sira.
Serbisu
hamutuk entre universidade importante ba rekursu umanu tanba, investimentu
kapitál rekursu umanu nu’udar meius atu aselera no diversifika ekonomia
Timor-Leste (TL) nian, ho dependénsia TL ba mina no gás. Lliuhusi
investimentu ne’e bele dezenvolve no sustenta TL hodi atinji ekonómia
sustentável iha 2030 ne’ebé mak estabelese iha Planu Estratéjiku Dezenvolvimentu
Nasionál (PEDN).
Kooperasaun
ne’e, Macau fornese relasaun no fundasaun ne’ebé forte hodi lori futuru no
kontribuisaun projetu koletivu ba TL, liliu ba kualifikasaun populasaun
Timor nune’e, dezenvolvimentu sosiu-ekonómiku TL.
Iha
fatin hanesan, reitór City University of Macau, Shu Guan Zhan hateten,
kooperasaun ne’e nu’udar sumbriña tanba, Macau hanesan ema hotu hatene “Di’ak
Liu” iha área turizmu no distingidu iha servisu indústria.
“Asinatura
Mou nu’udar meius atu hakbiit kooperasaun entre universidade rua nomós Macau
laran luak tebes hodi simu prezensa timoroan nian hodi estuda iha ne’ebá”, Shu
Guan Zhan katak.
Liuhusi
MoU ne’ebé asina ho UNTL sei hametin liu tan relasaun entre instituisaun
akadémika rua hahú agora no ba futuru.
Tuir
dadus ne’ebé ANTIL asesu husi UNTL, desde 2011 to’o ohin loron UNTL asina
ona akordu hamutuk 200 husi instituisaun sira ne’ebé iha eziste iha mundu. (jornalista:
Rafy Belo; editora: Rita Almeida)
Foto:
Reitór UNTL, Francisco Miguel Martins
Sem comentários:
Enviar um comentário