quarta-feira, 28 de setembro de 2016

ESKOLTU BALUN ‘BROKER’ IHA MINISTERIU – KOMISAUN B SUJERE HALO ROTASAUN


Membru Polisia Nasional Timor-Leste (PNTL) husi Unidades Corpo Seguransa Pessoal (CSP)  balun sai fali ‘broker’iha ministeriu sira hodi hetan lukru ba projetu governu nian.

Prezidenti Komisaun B Parlamentu Nasional (PN) ba asuntus Defeza, Seguransa no Negosiu Estranjeirus, David Dias Ximenes “Mandati”, husu ba Komando Jeral PNTL atu halo lalais rotasaun ba eskoltu sira ne’ebe durante ne’e fo seguransa ba ministru  sira, tanba balun sai fali ‘broker’ hodi hetan lukru ba projetus Governu nian.

Balun  fali, tuir Deputadu Mandati, halao fali knar hanesan sekretaria pesoal ministrus sira nian, hodi fasilita emprezariu sira ba hasoru ministru. Husi sira nia lobby ne’e, dala balun, empreza sira fo osan fee ba sira.

“Hau preokupa eskoltu sira ba iha membru Governu sira ne’e balun permanente tinan sanulu resin ona, hau husu ba boot sira tenke konfia ba instituisaun la bele konfia fali ba ema, se karik konfia fali ba ema entaun instituisaun ne’e ita deskonfia, ne’e maka uluk kedas hau dehan katak buat ida cleareng test tenki iha, tanba laiha entaun instituisaun maka tama sala fali no maun boot sira hili eskoltu tuir sira nia gostu no akhirnya jadi broker,”  afirma Deputadu Mandati iha plenaria PN, Segunda (26/9/2016).

Deputadu Mandati sujere ba Komando PNTL atu estabelese komisaun inkeretu independenti ida hodi halo investigasaun klean ba eskoltu sira balun ne’ebe sira nia salariu naton hela, mas sira nia vida moris glamor alias hetan regalias  husi fontes oi-oin.

“Hau husu halo investigasaun, peskiza tok ba para ita haree, labele deputado no membru Governu sira deit mak atu fo sai sira nia bens ne’ebe iha, mais haree tok eskoltu sira nian ne’e saida mak sira iha,” afirma membru Bankada FRETILIN ne’e.

Iha parte seluk, Mandati dehan, Polisia sira ne’ebe mak komando destaka iha postu la bele ejiji fasilidade kompletu, kuandu ejiji maka la persiza sai hanesan membru PNTL no diak liu fila ba funsionariu publiku.

“Iha lei no ordem dehan katak polisia sira pronto atu ba ne’ebe deit kuandu komando koloka. La bele kestiona fali fasilidades tenki kompletu, kuandu hein sasan kompletu la’os ona polisia, hakarak hein hanesan ne’e sai husi polisia ba funsionario publiku deit, no emprezario la’os sai fali polisia nein militar,” afirma Mandati.Mia

Jornal Nacional

Sem comentários: