Japaun Apoia Dezemvolvimentu TL

Dili, (ANTIL) – Embaixadór Japaun ba Timor-Leste (TL), Eiji Yamamato iha Manatutu, Sesta (21/10) hateten, Governu Japaun apoia máximu dezemvolvimentu TL, tanba nu’udar doadór dahuluk ne’ebé fo émprestimu ba governu TL.

‘’Ami hanesan doadór dahuluk, kontribui ba dezemvolvimentu infraestrutura TL. Maibé doadór sira seluk mós hakarak fornese émprestimu ba Governu TL’’  Embaixadór Japaun hateten ida-ne’e iha lansamentu reabilitasaun estrada Dili – Manatuto-Bacau iha Manatuto.

Objetivu hosi projetu ne’e, atu liu hosi melloramentu estrada hosi Dili-Manatutu-Baukauk bele hadia rede transporte no rede distribuisaun fizíku,  hodi kontribui ba dezemvolvimentu sosiál no ekonomia.

Governu Japaun fornese osan émprestimu ho montante 5.278 bilaun Yen (US$ 52 miloens) ba Governu TL hodi uja ba projetu ne’e.

Atividade konstrusaun komesa ona iha fulan Jullu ikus, tinan 2016. No sei kompleta iha fulan Maiu tinan 2019. Projetu ne’e sei hadi’ak estrada distánsia 106 km, iha liña 2, ba liña ida ho luan 3 metru ba dalan kareta nian, projetu ne’e inklui mós konstrusaun ponte 10.

Estrada nasionál númeru 1, hanesan sesaun estrada importante ida iha TL, ne’ebé hatutan Dili no Baukau. Maske distánsia hosi Dili ba Baukau ho de’it 114 km, maibé viajem bele presiza tempu besik oras 3-4 tanba kondisaun estrada ne’ebé kuak barak no kloot.

Kondisaun ida ne’e, trava  TL nia dezemvolvimentu sosiál no ekonomia. Tanba ne’e, iha urjensia atu hadi’ak estrada nia kondisaun sai di’ak, atu hadia movimentu transporte seguru . (Jornalista: Zezito Silva/Editor: Otelio Ote)

Foto: Serimónia lansamentu primeira pedra ba rehabilitasaun Estrada Dili-Manatutu-Baukau, Ministeriu obras públika no Telekomunikasaun (MOPTK), no atende hosi Embaixadór Japaun ba TL, Eiji Yamamato, MOPTK, Gastao Sousa, Ministru Planeamentu no Investimentu Estratéjiku, Kairala Xanana Gusmão, Embaixadór Timor-Leste, Hernani Coelho ofisiál governu sira/ Foto ANTIL, Nazario Guterres