LEJISLATURA BA DALA-IV, PN PROPOIN MILLOENS 3 SOSA KARETA HO LAPTOP

Konselhu Administrasaun Parlamentu Nasional (PN), liu husi relatoriu pareser Komisaun C propoin orsamentu US$ 3.000,000 atu sosa kareta ho laptop ba membru PN IV Lejislatura nian.

Iha diskusaun ne’ebe hala’o iha PN, Tersa (4/10/2016), mosu pro-kontra iha plenaria tanba membru PN balun lakohi atu sosa tan ona laptop ho kareta ba periodu ida ne’e.

Deputadu bankada FRETILIN, Francisco Miranda Branco esklarese katak, tinan 2016 hanesan tinan ikus liu ona ba III lejislatura, tanba ne’e nia husu atu halo reflesaun oitoan ba gastus finansas publikas, hahu husi PN no to’o ba iha instituisaun Estadu TL ninian.

“Ita iha tempu ida ne’ebe hau sempre hateten katak tempu karau bokor nian liu tiha ona, agora tempu karau krekas nian, se ita hare ba biblia Estado ninian fo mata dalan ba ita atu kaer tuir mos ida ne’e, hau atu dehan karik TL laiha riku soin hanesan minarai, maka ita lapersija deputado ida iha kareta ida, lapersija ema ida iha lap top ida, tanba ita ba husu emprestimu sosa kareta ka sosa lap top, tanba ne’e hau hanoin ita presijamente tenke halo balansu ba gastus huhu husi PN no ba instituisaun Estado tomak TL ninian,” dehan deputado Francisco Branco iha diskusaun debate Orsamentu privativu PN nian.

Deputadu Francisco Branco husu ba plenaria atu elimina tiha deit sosa kareta ho lap top ba deputadu ida-idak. Taba uluk, sosa kareta ida-idak razaun fundamental ida maka pontualidade, maibe realidade sempre kestiona, ne’ebe ho razaun fundamental ba pontualidade ne’e fo mai atu avansa proposta ida katak atu labele sosa tan kareta no lap top ona.

Deputado Branco mos halo komparasaun iha nasaun India, deputado sira laiha kareta, ba serbisu sa’e bus deit, maibe sira nia dignidade iha nafatin no laiha ema ida mak kestiona sira nia dignidade.

Xefi bankada FRETILIN, Aniceto Guterres kontra katak, xefi departamentu deit mos iha kareta rasik, tanba sa mak deputado laiha, ka deputado tenke sa’e motor ba serbisu.

“Xefi departamentu deit mos kareta iha, depois halo nusa deputado sa’e fali motor, ne’e problema? Entaun tenke muda politika atribui kareta ne’e ba se-se deit, hakarak kombate tenke hot-hotu, ne’ebe iha konferensia lideres bankadas kona ba kareta ne’e ami dehan katak orsamentu tinan 2017 halo previzaun tau hotu ba, depois deputado foun sira mai mak hola desizaun atu sosa ka lae,” hateten Deputadu Aniceto.

Deputado bankada PD, Virgilio Guterres, dehan katak, lakonsege tau osan ba deputado foun sira, tanba adopta politika poupansa.

“Hau mos kontra proposta, deputado balu hanoin katak, deputado foun ne’ebe atu mai ita lakonsege hola kareta ba sira ho hanoin katak poupansa ba despezas Estado tomak, lahola kareta foun ne’e parte ida husi politika poupansa entaun hau atu sujere deit katak, ita deputado atual agora kareta ho lap top rai fali ba sira, hodi nune’e sira mai uja,” hateten deputadu Virgilio.

Deputado Virgilio akresenta tan katak, xefi departamentu ida iha kareta, tanbasa mak deputado ida hola desizaun politika ba vida nasaun nian laiha dereitu atu goja regarias Estado nian.

“Ne’ebe hau hanoin tenke ser rasasinu ita ninia pensamentu ba servidor Estado ne’ebe tenke dignifika,” dehan Virgilio.

Hatan ba preukupasaun deputado sira nian, sekretario Jeral PN, Mateus X. Belo dehan katak, ne’e hanesan proposta deit, ne’ebe lori ba deskute hamutuk iha plenaria kuandu deputado sira lakohi atu aprova mos laiha problema, tanba nia hanesan halo planu deit mais atu foti desizaun husi plenaria.

Prezidente PN, Aderito Hugo da Costa, dehan katak, iha elaborasaun inisiu orsamentu privativo PN nian hamutuk $ 20 resin milloens, depois aprejentasaun iha reunioens hatun ba montante $ 17.697.mia

Jornal Nacional