KOMITE 12 NOVEMBRU LAMENTA HO ATITUDI OKNUM PNTL

Prezidente Komite 12 Novembru, Gregório Saldanha informa, Komite 12 Novembru lamenta ho atitude oknum Polisia Nasional Timor Lorosa’e (PNTL) ne’ebé maka sempre halo agresaun fiziku ba jornalista no ba komunidade sira, tanba ho atetudi elementu Polisia sira nian ne’e, hafoer fali instituisaun nia naran.

“Ha’u nia hanoin Komite 12 Novembru dezde prinsípiu la konkorda ho buat sira ne’ebé hanesan agresaun fízika, atuasaun violentu, sa tan baku ema ne’e komite la konkorda, tanba Komite 12 Novembru ninia membru sira uluk sai alvu ba polisia no militar Indonesia ninia hahalok, hanesan polisia no militar sira, tanba ne’e maka ate bainhira mós Komite 12 Novembru la konkorda ho hahalok sira ne’ebé hanesan uluk Indonesia sira halo,” Prezidenti Komite 12 Novembru ba JN-Diário iha ninia knaar fatin Balide-Díli, Segunda (21/11/2016).

Nia esplika katak, Komite 12 Novembru lakohi samakan PNTL ho polisia Indonesia ninian, maibé experénsia hatudu katak Timoroan barak maka polisia no militar Indonesia halo agresaun fíziku, baku no oho, tanba ne’e Komite 12 Novembru lakohi PNTL repete tan atitude ida ne’e.

“Komite 12 Novembru maka halibur ema 12 Novembru sira ne’ebé uluk sai mós alvu husi polisia no militar Indonesia ninian, nune’e ha’u lakohi buat ida ne’e repete tan, sé kazu ruma maka laloos husi ita nia populasaun no jornalista sira, ha’u nia hanoin tenki trata hanesan ema no investiga nian,” dehan Gregório Saldanha.

Nia akresenta katak, wainhira halo agresaun fíziku ba jornalista ne’ebé ho ninia knaar divulga informasaun verdade ba públiku, maibé sé nia implika ema ruma ninia privasidade, Estadu ninia bom nome ou nama baik, tuir lei Estadu no ema ne’e iha kompeténsia atu prosesa jornalista ne’e.

“Tanba ne’e maka ha’u lakohi halai liu ba sé maka sala no sé maka loos, maibé ha’u hakarak haree de’it aktus ne’ebé violentu no viola ema seluk nia direitu ne’e ita tenki fó atensaun, ha’u fiar katak ne’e la’os orientasaun husi Komandu PNTL maibé oknum balun maka hala’o servisu la loos, tanba ne’e ita koalia nafatin para komandu hadi’a ninia membru sira nia atetudi PNTL no karik komete krimi tenki prosesa tuir lei, tanba lakohi ita nia alin sira lori PNTL ninia naran estraga fali bom nome instituisaun ne’e rasik,” tenik Prezidenti Komite 12 Novembru.

Nia akresenta mós katak, formasaun no régra sira ba membru PNTL sira ne’e iha hela, nune’e importante maka membru sira tenki hala’o iha prátika formasaun ne’ebé maka sira simu no régras sira ne’ebé maka impoin ba sira tenki halo tuir.ves

Jornal Nacional