ME LOKE FAKULDADE DIREITU ARBIRU DE’IT

Jurista Timoroan, Dr. Manuel Tilman hateten, Ministériu Edukasaun (ME) dalaruma loke fakuldade direitu arbiru de’it, tamba ohin loron ema balun ne’ebé hasai tiha ona kursu iha direitu ba suru fali rai henek iha Comoro.

“Ministériu da Edukasaun mós dalaruma loke fakuldade de direitu arbiru de’it mak ba ne’e, tamba ohin loron balun ne’ebé ke hasai tiha kursu direitu, inan aman lakon osan barak ba sira, ohin loron ba suru fali rai henek iha Comoro ne’ebá, ou kaer fali mikrolet no taxi iha Díli, ida ne’e lisensiadu ne’e serve ba saida?,”esplika Dr. Manuel Tilman ba Jornalista sira, Domingu(18/12), hafoin remata nia diskursu iha konferensia Asosisaun Advogadu Timor Lorosa’e(AATL), iha hotel Ramelau.

Ne’eduni, nia dehan, ho konferénsia ne’ebé AATL hala’o bele loke dalan ba jovem Timoroan ne’ebé mak hasai ona kursu direitu iha sira nia estudu hodi bele tuir formasaun ne’ebé kualifikada hodi bele sai duni membru ordem de advogadus.

“Ne’eduni ami nia asimbleia jeral ida ne’e ho konsiensia ida katak, la’os hateke de’it ba ami sira ohin ne’ebé advogadu tiha ona ne’e, maibé hateke ba futuru aban bain rua, ami sei aprova ordem de advogadus, atu sai membru ordem de advogadus, ema ne’ebé ke tenki hetan uluk kursu de formasaun iha direitu duni i kursu sentru formasaun juridika duni, liu estajiu mak bele tama ba ordem de advogadus,”afirma Manuel Tilman.

“Asimblea jeral ohin ne’ebé hala’o para hili diresaun foun ba AATL, ho misaun boot ida, atu hadia estatutu AATL, hodi loke odamatan, liu-liu ba jovem sira rihun ba rihun ne’ebé mak inan aman sira gasta osan barak ona hodi hasai kursu iha direitu maibé laiha servisu no laiha fatin,”fundamenta Manuel.ías

Jornal Nacional