Aniceto Guterres: Tenki Estuda Hodi Mantein Popularidade

DILI (ANTIL) - Vice Prezidenti partidu FRETILIN, Aniceto  Guterres  husu ba Maria Vitoria “MARVI” alias Peróla Negra Timor-Leste la bele mout iha popularidade ne’ebé mak nia iha maibé, buka hakas án atu estuda nune’e karik iha futuru bele sai lider ida ba Nasaun RDTL, tanba nia iha ona capital popularidade.

“Bele akontese, dala ruma ema hanesan ne’e mout tiha iha popularidade nia laran kuandu la hatene tau án no la hatene aproveita,” Aniceto  Guterres hateten ba Jornalista wainhira remata sorumutu ho MARVI iha uma fukun, Sesta (06/01).

Nudar Vice-Prezidenti Partidu ho Xefi Bankada FRETILIN iha Parlamentu Nasionál (PN), Aniceto Guterres rekomenda ba MARVI atu aproveita tempu ne’e la’ós atu sai deit kantora maibé kapasita an hodi aumenta liu tan nia profile liu hosi eskola.

Tuir Aniceto, MARVI kuandu iha grau edukasaun ne’ebé mak di’ak, dala ruma bele akontese hanesan iha rai seluk ne’ebé artisita ba fali hala’o politika no rezultadu ikus sai deputadu-deputada no governante.

“Ida ne’e bele akontese iha Timor aban bain-rua. MARVI iha ona capital popularidade,” Aniceto observa no hatutan katak wainhira MARVI iha grau edukasaun di’ak iha posibilidade atu sai lider ida iha futuru atu kontribui iha rai Timor.

“Ita hotu-hotu orgullu, liu-liu ha’u hanesan ema ida ne’ebé uluk aktivista polítika haree bainhira MARVI ema ida ne’ebé hamorin ona Timor nia naran iha Asia liu hosi kanta hodi mosu iha televisaun ema hakilar Timor-Leste,” Aniceto  fó sai nia sentimentu. No dehan “MARVI, Extra Ordinariu tebes.”

Pérola Negra Timor-Leste alias MARVI, nunka iha hanoin katak, Fans MARVI iha Timor, liu-liu Dili hatudu entuziasmu makas ho nia prezensa iha nia rai bainhira nia fila hosi Jakarta durante fulan rua luta iha kompetisaun Dangdut Akademi Asia 2 (DAA2) iha Jakarta, Indonézia.

Maria Vitória ho naran istimadu MARVI, sente laran taridu bainhira prepara an iha Denpasar, Indonezia hodi mai Dili bainhira nia rona katak fans iha Dili prepara atu simu nia.

“Iha Bali (Dempasar) ha’u rona ona katak fans sira iha Dili atu simu, maibé ha’u la imajina fans barak hanesan ne’e,” Maria Vitória haktuir iha Aero Portu Nikolau Lobato, Kinta (5/1).

Marvi nia hakfodak bele dehan katak kahor ho kontenti tanba sente fans halo supreza ba nia iha nia moris ne’ebé nunka hanoin katak sei akontese iha nia vida. Fans haklalak hodi temi “MARVI…MARVI….MARVI..,” maske la haree MARVI nia oin tanba nia sei iha Aviao Sriwijaya nia laran hein minutu balun atu aterra.

Oklu metan iha nia matan kombina ho fuk badak to’o kábas ho vistidu matak, hamnasa hit liman ida hodi tun nei-neik hosi iskada aviaun nia no simu direita hosi reperejentante artista Timor, Maun João Mintha ho Mana Aida Soares Belo, sira nain rua intrega aifunan ba MARVI nu’udar sinál solidaria hosi artista Timor ba MARVI tanba orgullu ba prestasaun ne’ebé mak nia iha.

“Hanesan artista Timor-oan ami sente MARVI ami nia motivadora no ispirador nune’e mós hanesan ami nia embaixada iha nasaun estranjeiru,” João Mintha haktuir ho sentimentu orgullu.

La’ós ida ne’e de’it, hafoin simu aifunan MARVI antes hakat ba sala VIP aero portu nian, uluk nanain nu’udar lisan no kultura lian nain hamulak hodi fó dadolin kona-ba agradesementu nune’e kada hakat ba hakat seluk atu liu ba sala VIP MARVI hetan akompañamentu ho dansa tradisionaol.

Iha nia viajem badak ne’e, nia taka liman tau iha hirus matan la’o iha klaran hetan akompañamentu hosi Sekretáriu Estadu Juventude Desportu, Vice Ministra Edukasaun inklui komisaun organizadora hodi tama ba sala VIP atu realiza konfrensia Imprensa.

“Obrigada Nai Jesus Kristu ne’ebé hakraik ona forsa no kbi’it hodi hau tuir kompetisaun hosi inisiu to’o ramata ho susesu. Ida ne’e hanesan kebangaan besar (Orgullu boot) ba ha’u hodi ba oin ha’u sai di’ak liu tan,” MARVI harohan bainhira hamrik entre nia aman ho ulun boot Timor ne’ebé simu nia  iha Konfrensia Imprensa.

Tanba isperitu simplisidade ne’ebé nia komunga hafoin fó agradeseimentu ba Na’I Jesusu, la haluha fó mós obrigadu ba Aman Nasaun RDTL Taur Matan Ruak. Kay Rala Xanana Gusmão no Primeiru Ministru Rui Maria de Araújo inklui povu doben no reprejentante povu iha uma fukun.

“Tan imi nia domin imi fó mai ha’u. ha’u sura la bele,” MARVI hato’o ho matan ben nakonu.

Liafuan obrigada, Obrigada, sempre iha MARVI nia ibun tutun “ Wow….ha’u la iha liafuan atu koalia,” lian ikus bainhira haree fans sira rihun ba rihun ho pasensia hein MARVI maske loron manas.

Oras hatudu tuku rua meudia, maibé sente hanesan dadersan la preokupa loron manas ou la’e, labarik ki’ik-oan, juventude, ferik no katuas forma hosi Aeroportu haklalak MARVI…MARVI…MAR..VI no liman foti telephone hodi prepara hasai MARVI nia retratu.

Extraordinariu tebes ema nia entusiasmu ba MARVI durante halo konvoi. (Jornalista: Manuel Pinto/Editor: Alberto ALves)

Foto: MARVI Komprementa Prezidenti Parlamentu Nasional ho Xefi Bankada Sira iha Parlamentu Nasional. FOTO ANTIL : Antonio Gonçalves