Laiha Duvida Ba Feto Nia Kapasidade Iha Eleisaun Jeral

DILI – Laiha duvida ba feto sira nia kapasidade iha eleisaun jeral, tanba feto mos preparadu tuir sira nia kapasidade neebe mak iha, nomos Fundasaun Caucus no Patria fo kapasitasaun ba feto sira.

Tuir deputadu husi bankada PD, Adriano Joao hatete, feto mos bele kompete iha eleisaun jeral, liu-liu iha eleisaun parlamentar, tanba ema hotu hatene katak, numeru 1-3 nee feto tenke iha, tanba feto presiza iha numeru 1-3.

Hau hanoin ita laiha duvidas ba feto sira nia kapasidade, tanba sira mos preparadu ona sira nia aan liu husi formasaun neebe mak durante nee sira hetan iha fundasaun caucus no patria.Feto potensial husi Partidu Demokratiku, barak teb-tebes atu kompete iha eleisaun parlamentar ninia, maibe ba iha eleisaun prezidente ninia nee ami seidauk disidi,” dehan deputadu Adriano ba STL liu husi via-telefone Dili, Sesta (06/01/2017).

Deputadu nee mos husu ba feto sira atu bele kompete mos iha eleisaun prezidenete, tanba feto tenke hatudu brani, no hatudu kapasidade hodi bele kompete mos iha eleisaun prezidente neebe mak sei halao iha tinan ida nee nia laran.

Iha parte seluk, Direitora fundasaun patria, Laura Pina, liu husi via-telefone hatete, husi Fundasaun Patria no Caucus sempre fo formasaun ba feto maluk sira, tanba iha eleisaun jeral nee la hanesan ho eleisaun suku, tanba iha eleisaun jeral nee mai husi partidu ida-idak mak sei reprejenta nia feto hodi bele tuir formasaun husi Fundasaun Patria no Caucus. Informasaun kompletu iha STL Jornal no STL Web, edisaun Sabado (7/1/2017). Jacinta Sequeiraa/Guilhermina Franco 

Suara Timor Lorosae