Marvi, Aileba Nia Oan

SUPORTER (Marvilovers) balun hosi estrela foun Timor-Leste nian, Maria Vitória (Marvi) ne'ebé Kinta (05/01) kalan, asiste Marvi nia konser iha Centru Convensaun Dili (CCD) tanis.

Tansá? Lia fuan hosi Antonio Borges, Marvi nia aman ne'ebé nakonu ho sentimentu, halo Marvilovers sira ne'e, hakruuk. Tanis.

Situasaun ne'ebé foufoun barillu, hakfodak sai kalmu bainhira Antonio Borges hasai lia fuan dehan:

“…Maske ha'u nia oan Maria Vitória, oras ne’e daudauk sai ona artista, maibé nia abut, nafatin mai hosi povu aileba. Maria mai hosi jerasaun aileba…”

Antonio Borges, ne'ebé koñesidu ho naran istimadu Pai Toy, hateten lia fuan murak hirak ne'e, hafoin Pai José 5, juri Dangdut Academy Asia 2 (DAA2), ne'ebé kalan ne'e sai nu'udar Master of Ceremony, entrega mikrofone ba Pai Toy, atu hato’o lia menon balun ba Marvilovers sira.

Antonio Borges mós tanis. Mata wen suli iha ninia matan okos. Antonio kala hanoin filafali moris uluk. Ninia oan Marvi ho ninia alin sira-nia nia moris ne'ebé nakonu ho terus no susar. Fa'an modo kankung tuir lurón, para bele susteinta sira-nia eskola no nesesidade seluk.

“Ha'u sente triste loos ho Marvi nia aman nia lia fuan, ne'ebé furak no nakonu ho sentimentu. Katuas Antonio ema ne'ebé hakraik an duni. Ida ne'e mak halo ha'u tanis,” dehan Onito Caminha (15), Marvilovers ida hosi Lospalos.

Iha fatin seluk, Marvilovers Martin Amaral (28) dehan nia sente orgullu ho Marvi nia aman, Antonio Borges.

“Maski nia oan ne'ebé agora sai ona artista koñesidu no Timor-oan barak hadomi Marvi. Katuas Antonio hakraik an nafatin no la nega nia moris nu'udar aileba ida. Ita hotu haree no asiste katuas nia hakraik an ne'e halo ita triste no tanis,” Martin hateten.

“Obrigado barak ba imi hotu nia suporta, orasaun no favor. Imi nia di'ak tomak, ha'u sura no selu labele. So Maromak mak bele selu,” hateten Antonio Borges iha ninia lia fuan ikus.

Marvilovers rihun ne'ebé kalan ne'e namlele hela ho situasaun sentimentu, hakfodak hamriik no haksoit. Sira foti liman aas no hamutuk hakilar “Marvi….Marvi….Marvi…” (*)

Aquino Campos – Ola Timor -  Editór: Alexandre Assis

Foto 1: Antonio Borges, artista Dangdut Academy Asia 2 (DAA2) Maria Vitoria nia aman. (Olatimornews Foto/Aquino Campos)

Foto 2: Marvi bainhira anima Marvilovers sira iha CCD, Kinta (05/01) kalan. (Olatimornews Foto/Aquino Campos)

LEE MÓS IHA OLA TIMOR