quinta-feira, 23 de fevereiro de 2017

BARATA IHA HNGV MAI HUSI HAHAN ÁT

PARTILHAR
Rezultadu husi familia pasiente sira lori hahan husi uma no lori sasan barak mai iha Hospital Nacional Guido Valadares (HNGV) mak halo barata barak, tanba hahan rai to’o át.

“Loos duni ema barak kestiona konabá barata iha HNGV, ha’u sempre koalia katak barata ne’e tama liu husi ne’ebé no tanba saida maka barak, kompañia ne’ebé maka toma konta ba asegura HNGV moos ne’e iha orariu ne’ebé maka HNGV halo rasik hodi halo limpeza no redus ba barata sira ne’e, kompañia sira mós iha aimoruk hodi rega no fase kada fulan no kada semana, maibé fila ba ita hotu-hotu ninia konsiensia oinsa maka ita hotu-hotu servisu hamutuk para redus barata, tanba barata mai husi hahan ne’ebé maka barak liu no sasan ne’ebé maka barak liu,” Xefi Unidade Kualidade no Kontrolu HNGV, Paulina Pinto ba JN-Diário iha ninia knaar fatin HNGV-Díli, Kuarta (22-02-2017).

Nia esplika katak, iha sala enfermaria sira ninia laran ne’e iha pasiente ida (1) ema nain hat (4) maka hein, sira lori sasan barak tau iha HNGV, tanba ne’e maka husi parte HNGV informa ba familia sira atu labele lori hahan ou sasan barak, maibé barak maka ulun to’os nafatin, tanba sira dehan ne’e sira nia direitu.

“Ami sempre iha sirkulasaun orariu ne’ebé maka dezde uluk to’o agora, ami tetap iha sirkulasaun orariu ho ami nia regulamentu katak kada kama ida pasiente ida (1), ema nain ida (1) maka hein no konabá hahan, bee buat hotu-hotu HNGV maka fornese,” dehan Xefi Unidade Kualidade no Kontrolu HNGV.

Nia akresenta katak, maibé HNGV haree katak pasiente barak maka hakarak han hahan ne’ebé maka lori husi uma, nune’e planu ba oin hakarak ka lakoi hahan ne’ebé maka HNGV fornese sira tenki konsumu, tanba parte nutrisaun iha HNGV halo ona kalkulasaun menu, nune’e hakarak ka lakoi sira tenki uza hahan ne’ebé maka HNGV fornese.

“Tanba ida ne’e ba sira nia direitu tomak no tanba ita nia Governu lakon osan barak ba hahan, ba pasiente ninian, maibé ita pasiente sira maka dalaruma lakoi han hahan HNGV ninian,” tenik Paulina Pinto. ves

Jornal Nacional
PARTILHAR

Author: verified_user

Publicação luso-timorense sem fins lucrativos

0 comentários: