quinta-feira, 23 de fevereiro de 2017

Polisia Kaptura Suspeitu Nain Ida Ba Kazu Omisido Viqueque

Polisia Nasional Timor-Leste (PNTL) kaptura ona suspeitu nain ida ba kazu omisido ne’ebe mak akotense iha munisipiu Viqueque.

Segundu Komandante Jeral PNTL, Komisariu Faustino da Costa hateten, kazu omisido ne’e deskonfia iha indikasaun krimi organizadu, tanba vitima ne’e ema hakoi iha nia uma kotuk.

“Mate isin agora dadaun iha mortuariu no submete ona ba prosesu otopsia,” Komisariu da Costa informa, iha Dili.

Nia konta, vitima ne’e mestre ida no ema hakoi nia ho kondisaun tuur iha nia uma kotuk rasik. Durante fulan hira nia laran, vitima nia fen buka maibe la hetan no ikus mai nia fen mos ema kaer no hakoi ho kondisaun moris, ulun sai hela no taka deit ho ai tahan.

Depois de ida ne’e, nia hatutan iha dia 5 fulan Dezembru  2016 komunidade sira hetan hodi telefone ba polisia hodi atua kazu ne’e.  

Kona ba vitima nia fen, nia dehan agora moris hela no halo hela tratamentu saude iha Ospital Referal Baucau.

Nia dehan, informasaun detalhu kona ba tansa saida mak suspeitu sira  halo aksaun hanesan ne’e hasoru vitima no nia fen, prosesu investigasaun mak bele detekta.

Iha parte seluk Komandante Polisia munisipiu Viqueque, Superintendente Antoninho Mauluta, deskonfia katak iha ema barak mak involve iha kazu omisido ne’e.

Tanba ne’e, sira kontinua buka tuir sira seluk ne’ebe deskonfia involve iha kazu ne’e.

“Fiar katak ba oin ita sei kaptura sira seluk,” nia fiar.

Agora dadaun, nia dehan sira hein hela despaixu husi Ministeiru Publiku kona ba kazu ida ne’e.

Iha parte seluk Membru Parlamentu (MP) Francisco da Costa, husu ba polisia atu kontinua esforsu buka tuir suspeitu seluk ba kazu ne’e, hodi sira bele responsabiliza hahalok ne’ebe sira komete.

“Hau hanoin aktu sira hanesan ne’e demais liu ona, polisia tenke buka tuir suspeitu sira ne’e,” nia lamenta.

Sem comentários: