domingo, 12 de fevereiro de 2017

Governu Rehabilita Plantasaun Kafe Iha Munisipiu Rua

Ministeriu Agrikultura e Pescas (MAP) hahu halo rehabilitasaun ba plantasaun kafe 500 hektares iha munisipiu Ermera no Liquisa iha tinan 2016 ne’e, ho objetivu atu aumenta produsuan kafe iha rai laran.

Ministru Estanislau da Silva, hateten 500 hektares ne’e kompostu husi 350 hektares husi munisipiu  Ermera no 150 hektares husi munisipiu Liquisa.

“Ami servisu hamutuk ho parseiru dezenvolvementu sira, hodi hasae produsaun kafe iha timor,  Ministru da Silva hateten.

Nia konsidera, ne’e hanesan progresu no rezultadu ne’ebe mak MAP atinji iha durante tinan ida ho balun nia laran.

Tuir nia, pela primeira vez hahu husi primeiru governu no to’o mai iha V governu nunka iha programa rehabilitasaun ba plantasaun kafe.

“Iha governu ida uluk tau duni iha programa, maibe la konsege implementa entaun agora ami halo,” nia hateten.

Nia konsidera, kafe nudar fator determinante ida hodi hasa’e reseitas estadu kuandu governu dezenvolve ho diak inklui mos bele atrai ema hodi mai halo investe iha area kafe nian.

Iha parte seluk Membru Parlamentu Nasional, Jacinta Abucau Pereira, apoia inisiativa ida ne’e, maibe seiduak hatudu rezultadu tanba foin mak halo iha tinan ida ne’e.

“Ita seiduak bele atu koalia lai nia progresu,” nia hateten.

Tanba koalia kona ba rehabilitasaun kafe, nia dehan iha prosesu barak mak sei ultrapassa no la’os fasil, hanesan ohin halo aban hetan ona rezultadu.

“Tanba ita sei tesi nia kain, kuida didiak halo prosesu oin-oin to’o nia fuan,” nia hateten.

Tanba ne’e,  nia husu ba Ministeriu Agrikultura e Peskas atu labele ignora servisu ne’ebe halo ona husi ministru sesante.

The Dili Weekly - Venidora Oliveira

1 comentário:

soares disse...

Belun Jornalista sira bele confirma fila fali sera que rehabilitasaun maka ne'e de'it ona sei continua tan? Platansaun Cafe sira ne'ebe rehabilita ne'e pertense ba povo ninia ou plantasaun ne'ebe tutela ba NCBA/CCT? Sekarik governo hanoin atu rehabilita tan, ha'u hakarak entrega ami nia plantansaun ba governo ho ninia agensia sira maka superviziona. Plantansaun refere iha Municipio Ermera.

Um abraco.
Husi Leitores Blogger Timor Agora

Soares.

NB: Bele confirma mai ha'u ninia correio electronico; santana81@gmail.com